Këshilli Mbikëqyrës i Bankës së Shqipërisë vendosi heqjen e komisioneve të aplikuara nga bankat për transfertat e kreditit në lekë nga klientët e tyre, si dhe të tarifave për pjesëmarrësit në sistemet e pagesave AIPS (Albanian Interbank Payment System) dhe AECH (Albanian Electronic Clearing House) të operuara nga Banka e Shqipërisë, duke filluar nga data 10 prill 2020.
“Ky vendim ka për qëllim mbështetjen e klientëve të bankave për vijimin e kryerjes së pagesave të tyre në kushtet e kufizimit të lëvizjes dhe gjithashtu mimimizimit të rreziqeve nga grumbullimi i popullatës në degët e bankave. Më konkretisht, ky vendim synon të bëjë më tërheqës përdorimin e shërbimeve Homebanking nëpërmjet eliminimit të kostove të këtij shërbimi”, thuhet në njoftim.
Njëkohësisht, në mbështetje të këtij vendimi, Banka e Shqipërisë eleminon komisionet e aplikuara për përdorimin e sistemeve të pagesave të Bankës së Shqipërisë nga ana e bankave për të balancuar kostot e mbartura prej tyre.
