Mjeku pneumolog, Arjan Mezini, sqaroi sot gjendjen e pacientëve të shtruar në spitalin “Shefqet Ndroqi” që është kthyer në spitalin “Covid 2”.
Mezini tha se në këtë spitali janë 6 pacientë të prekur me koronavirus, ndërsa 12 të tjerë janë me pneumoni bilaterale, por testet për Covid-19 kanë rezultuar negative.
“Aktualisht në këtë spital kemi 5 pacientë me Covid 19 në terapi intensive, 4 prej të cilëve janë në intubim, pra në gjendje të rëndë shëndetësore.
Fillimisht ishin 6 pacientë në terapi intensive, por njeri prej tyre doli mbrëmjen e djeshme në pavion, në gjendje shumë më të mirë shëndetësore”, tha Mezini në një lidhje me skype për Abcnews.
Mezini tha se mosha mesatare e pacientëve është 60 vjeç.
Lidhur me medikamentetet kundër Covid-19, Mezini tha se ende nuk kemi një terapi të çertifikuar.
“Po përdorim anti-viralët, ndërsa anti-malarikët duhet të përdoren vetëm me këshillimin e mjekut, dhe varet edhe nga pacientët.
Ndërsa terapinë me plazma, të pacientëve të shëruar, ne nuk e përdorim, por edhe jashtë përdoret te pacientët në gjendje të rëndë”, tha Mezini.
Pneumologu tha se kur paraqiten rastet e rënda, pra pacientë që kanë nevojë për intubime, nga eksperiencat, mund të them se mund të kemi kaluar pikun e koronavirusit.
“Ky është një indikacion, dhe mendoj se ne e kemi kaluar këtë kulmin, pasi sot nuk kemi raste të rënda, të shtruara rishtas”, tha Mezini.
