Shkodra është qyteti i dytë më i prekur nga koronavirusi, ndërsa janë evidentuar 44 raste, mes të cilëve edhe një paciente e moshuar që ka humbur jetën.
Ndërkohë në orët e fundit 17 persona, mes të cilëve edhe personel mjekësor, i janë nënshtruar testit për Covid-19 dhe priten përgjigjet e analizave.
Personave që i janë nënshtruar tamponit janë kontakte të afërta, ose personel mjekësor, që i kanë shërbyer pacientëve që kanë rezultuar pozitiv me koronavirus.
Ndërkohë në qytetin më të madh në very të vendit janë shtuar masat policore në kontrollet e qytetarëve që lëvizin, veçanërisht pranë tregjeve.
Në terren kanë zbritur forcat e Policisë së Shtetit, ato të bashkisë, por edhe të Policisë Ushtarake.
Shkodra ishte një nga qytetet që në fillim të evidentimit të rasteve të para me koronavirus nuk ishte prekur, por duket se shkujdesja e qytetarëve dhe mosrespektimi i rregullave, veçanërisht pjesëmarrja në ceremoni mortore, krijoi një situatë të rrezikshme në këtë qytet, ku brenda pak ditësh u ekzaminuan 44 raste me Covid 19.
