Tre persona janë vënë në pranga dhe tre të tjerë janë proceduar penalisht në 24 orët e fundit nga policia në zbatim të masave kufizuese për vënien në kontroll të pasojave që sjellin përhapjen e COVID-19.
Burime zyrtare bëjnë me dije se është vënë në pranga shtetasi K. J., 18 vjeç, banues në Tiranë. Ky shtetas gjatë pasdites së djeshme duke lëvizur pa leje ka kundërshtuar dhe goditur me grusht punonjësit e Policisë.
Në Tiranë janë proceduan penalisht dhe shtetasit L.GJ., 20 vjeç dhe E.J., 25 vjeç, sepse janë konstatuar duke lëvizur gjatë orarit të ndaluar të lëvizjes dhe kanë kundërshtuar urdhrin e punonjësve të Policisë.
Në Berat është arrestuar shtetasi D. R., 33 vjeç dhe është proceduar në gjendje të lirë shtetasi A. P., 49 vjeç. Këta shtetas janë konstatuar nga punonjësit e Policisë duke lëvizur pa mjet identifikimi, jashtë orarit të lejuar të lëvizjes dhe kanë kundërshtuar punonjësit e Policisë gjatë shoqërimit për në komisariat, ku shtetasi D. R. i ka kundërshtuar punonjësit me dhunë.
Ndërkohë, në Tiranë është arrestuar dhe shtetasi A. B., 45 vjeç, pasi është konstatuar duke drejtuar mjetin në gjendje të dehur, në masën 1.11 mg/l.
