Rritet sërish numri i viktimave në Itali, e nga 525 që ishin të dielën, në buletinin e përditësuar u raportuan 636 jetë të humbura në 24 orët e fundit. Megjithatë, rastet e reja vijojnë të jenë në ulje. Në 24 orët e fundit pati 1941 të infektuar, kundrejt gati 3 000 që ishin një ditë më herët.
Në total, Covid-19 u ka marrë jetën 16 523 personave në Itali. Mes viktimave të fundit është edhe një 38-vjeçar nga Abruco, pa probleme të tjera shëndetësore, ndërsa numri i mjekëve që kanë humbur jetën shkon në 87.
Megjithatë, autoritetet lokale të Lombardisë nuk kanë më dyshime se situata është drejt një përmirësimi të ngadaltë, por të qëndrueshëm. Përballë sinjaleve pozitive gjithnjë e më të forta, italianët po fillojnë të mendojnë për rikthimin në jetën normale. Zv/ministri i Shëndetësisë, Pierpaolo Sileri tha se pas disa javësh, ndoshta para majit, mund të fillojnë të dalin.
E megjithatë, mundësia e hapjes së kishave për Pashkë u përjashtua nga guvernatori i Lombardisë, Atilio Fontana.
