Mësuesit nuk e kanë marrë të plotë pagën e muajit mars. Nga ana e Ministrisë së Arsimit atyre nuk u është bërë i ditur ky urdhër, ndërsa janë gjendur përballë një fakti të kryer. Vetëm pasi është bërë publik ky fakt, ka reaguar ministria përmes një deklarate.
Deklarata
Në lidhje me pretendimet për prekje të pagave të mësuesve duam të sqarojmë se nuk ka asgjë të vërtetë pasi ato janë llogaritur të plota, për 22 ditë.
Sot në të gjitha zyrat arsimore janë përgatitur dhe dërguar në degët e thesarit pagat e gjithë personelit në varësi.
Një pjesë e mirë e mësuesve i ka pagat në llogaritë personale dhe pjesa tjetër për shkak të procedurave në degët e thesarit, është në proces dhe mendojmë që ditën e hënë çdo punonjës të ketë marrë pagën e muajit Mars 2020.
E vetmja ndalesë në pagë është pagesa e vështirësisë së largësisë, e cila jepet për mësuesit që punojnë larg vendbanimit të tyre dhe përfitojnë rimbursim për shpenzimet e transportit. Pas datës 9 mars ata nuk kanë udhëtuar, prandaj nuk kanë përfituar transport dhe nuk mund ta përfitojnë. Kjo pagesë është bërë në proporcion me kohën që mësuesit kanë udhëtuar ,pra nga data 1 mars deri në datë 10 mars, pasi më tej mësimin e kanë zhvilluar nga shtëpia.
Kjo pagesë jepet si vështirësi për largësi dhe është e diferencuar 1000 lekë, 1500 lekë dhe 2700 lekë në muaj. (mësuesit kanë marrë 1/3)
Në lidhje me orët kujdestari sqaroj se janë paguar të gjitha konform ngarkesës mësimore të miratuar nga drejtorët e shkollave.
Ndryshim ka pasur vetëm pagesa e orëve suplementare për periudhën nga data 10 mars deri në 31 mars, pasi gjatë kësaj kohë mësimi është bërë nga shtëpia. Ndërkohë ngarkesat mësimore javore nuk janë zhvilluar të plota, pasi vetëm në këtë periudhë (10 deri 31 mars) kemi pasur 4 ditë pushim, nga të cilat dy kanë qenë festa zyrtare, data 14 mars dhe data 22 mars, të cilat janë bërë pushim ditëve të hëna. Kemi pasur edhe dy ditë pushim të vendosura me VKM ditëve të premte.
Pra në këto kushte kur një nga ditët e javës ka qenë pushim nuk ka si të realizohet ngarkesa mësimore përtej normës javore.
