Deontay Wilder pësoi humbjen e parë në karrierë në atë disfatë totale kundër Tyson Fury. Duket se ajo humbje ka ndikuar shumë te amerikani, i cili tashmë duket i dorëzuar duke mos i ngjarë aspak “luftëtarit” me të cilin jemi mësuar.
Të paktën këtë përshtypje të lënë intervistat dhe ato çfarë ka postuar pas ndeshjeve të 22 shkurtit. Duke parë këtë situatë ka reaguar dhe legjenda e boksit, Mike Tyson, i cili inkurajon patriotin e tij të harrojë gjithçka dhe mos të humbasë krenarinë e tij pas një humbjeje.
Gjatë një bashkëbisedimi live në “Instagram” me reperin Fat Joe, Mike Tyson, ka thënë: “Wilder ndihet sikur po heq dorë; Oh jeta ime ka mbaruar. O Zot dua të vdes”. Ai duhet ti lërë ato budallallëqe. I them Wilder-it që të “rritet” ta përballojë situatën, ai nuk duhet të ndihet i trishtuar ose i dekurajuar. Duhet të vazhdojë të dalë në ring me shumë zell dhe besim”.- ka thënë Tyson.
