Covid 19 ka shkaktuar 277 viktima në Turqi, ndërsa në 24 orët e fundit kanë humbur jetën 63 persona.
Shifrat u bënë publike nga ministri turk i Shëndetësisë, Fahrettin Koca.
Numri i rasteve të konfirmuara me COVID-19 u rrit në 15.679, pasi 2.148 persona kanë rezultuar pozitivë në teste në 24 orët e fundit, tha Koca në një konferencë për media pas një takimi të Këshillit Shkencor për Koronavirusin.
Gjithsej 333 pacientë janë shëruar dhe liruar nga spitalet që nga fillimi i pandemisë, sipas shifrave të fundit. Ndërkaq, rreth 979 pacientë janë duke u trajtuar në njësitë e kujdesit intensiv.
Po ashtu, në 24 orët e kaluara janë kryer 14.396 testime, me çka numri i përgjithshëm i testeve të kryera deri më tani ka shkuar në 106.799.
Ministri Koca tha se Stambolli mbetet qyteti më i prekur nga virusi, me 8.852 raste, që përbën 60 % të të gjitha rasteve në vend, ndërsa pas tij radhiten Izmiri me 853 dhe Ankaraja me me 712 raste.
