Lideri i LDK-së Isa Mustafa dhe kreu i LVV-së Albin Kurti kanë folur për mediat pas takimit që zhvilluan me presidentin e Kosovë, Hashim Thaçi ku diskutuan rreth hapave të ardhshëm, pas rrëzimit të Qeverisë, përmes një mocioni mosbesimi në Kuvend, javën e kaluar.
Albin Kurti ka deklaruar se pyetjes së presidentit për një qeveri të re, iu janë përgjigjur negativisht duke deklaruar se bashkë mund të bisedojnë vetëm për zgjedhje të reja.
“Pyetjeve dhe përpjekjeve të presidentit që ne të flasim për mundësinë për qeverinë te rë për kandidatura të reja u jemi përgjigjur me qëndrimin tonë për të cilin jemi të bindur që është jo vetëm i drejtë por edhe i vetmi në bazë të kushtetutës, nuk mund të kapërcejnë diku tjetër duke mohuar nenin 82 pika 2 të Kushtetutës, që thotë se pas një mocioni të mosbesimit ajo çfarë ngelet është të shkohet në zgjedhje të reja. Të bindur se Kushtetuta nuk krijon mundësinë në kontekstin aktual politik që ne të kemi qeveri të re, pa zgjedhje të reja”, tha Kurti.
Ndërsa Isa Mustafa tha se partia e tij vlerëson se nuk është koha të shkohet në zgjedhje, por mbështet krijimin e një qeverie të re.
“Ne vlerësojmë se nuk është koha të shkohet në zgjedhje, për shkak të pandemisë. Ne jemi që të bëhet nje qeveri e re, në bazë të Kushtetutës e aktgjykimit të vitit 2014. Sot nuk kemi biseduar fare për emrin, por vetëm për vullnetin politik”, ka thënë ai.
Mustafa në të njëjtën kohë ka folur edhe rreth përplasjeve të tij me Kryeministrin në detyrë, Albin Kurtit.
“Nëse ia kthejmë z. Kurtit krejt çka ka thënë ai për mua, do t’ia ulja nivelin vetes dhe partisë që përfaqësoj. Tani kemi një aktgjykim se janë shkelur nenet e të drejtave të njeriut… të gjithë ne kemi dhenë vërejtjet atë ditë. Qeveria duhet të kërkojë falje qytetarëve”, ka thënë Mustafa.
