Portieri i famshëm turk, Rüştü Reçber, është i infektuar me koronavirus. Lajmin e ka bërë të ditur partnerja e portierit 46-vjeçar e cila ka shfaqur dhe shqetësimin e saj.
“Gjithçka ishte në rregull deri sa ai papritmas filloi të shfaqë simptoma. Këto janë periudha të vështira dhe ne jemi akoma në gjendje shoku. Kërkesa ime e vetme për të gjithë është që të mendojnë dhe të tregojnë respekt”. – shkruan partnerja i portierit në Instagram.
Rüştü është futbollisti turk me më shumë paraqitje në historinë e kombëtares së Turqisë me 120 ndeshje. Ai ka fituar shumë trofe me Fenerbahçen dhe Beshiktashin, ndërsa kulmi i karrierës së tij ishte vendi i tretë në Kupën e Botës së 2002 duke u renditur si portieri i dytë më i mirë në turne pas Oliver Kahnit.
