Kreu i Aleancës për Ardhmërinë e Kosovës, Ramush Haradinaj, ka akuzuar kryeministrin në largim, Albin Kurtin, për financim të dyshimtë nga, siç ka thënë ai, “qarqe të dyshimta kundër Kosovës”.
Në një intervistë për Insajderin, Haradinaj është shprehur se Kurti e ka pasur fushatën më të shtrenjtë, prej të gjithë kandidatëve për kryeministër në zgjedhjet nacionale të 6 tetorit.
Ai ka thënë se Kurti ende nuk i ka treguar financat e tij dhe partisë së tij, Lëvizjes Vetëvendosje.
“Kurti si ka treguar ende Kosovës se sa para ka shpenzuar për fushaten e tij që ka qenë më e shtrenjta nga gjithë ne. Le të tregojë ai sa pare harxhon për të gjitha këto faqe të përkrahësve të tij, sepse kushton me mbajt një infrastrukturë të tillë. Ai financohet nga qarqe të dyshimta që janë kundër Kosovës”, ka thënë Haradinaj.
Haradinaj ka akuzuar Kurtin se “është mashtrues, koncepti i tij është mashtrim. Është jashtëzakonisht elokuent por jo gjithmonë mund të mashtrojë”.
Haradinaj është shprehur dhe se kryeministri në largim Kurti është “më i korruptuar” se të gjithë politikanët e tjerë.
Ai ka thënë se Luan Dalipi, shefi i Kabinetit të Kryeministrit në largim, Albin Kurti, është i akuzuar për korrupsion dhe se posedon tri shtëpi në lagjen luksoze “Marigona Residence”.
“Ai është më i korruptuar se të gjithë të tjerët. Ai e ka praktikën: ‘t’ua thom, sa s’më kanë thënë. Ai ka marrë Luan Dalipin shef të Kabinetit. Një njeri të akuzuar për korrupsion nga BE-ja. Luan Dalipi ka tri shtëpi në Marigonë. Pyetja shtrohet: ‘A mos dy prej tyre janë të Albinit dhe Vetëvendosjes?’”, ka thënë Haradinaj.
