Pas më shumë se 3 orësh ka përfunduar mbledhja e Këshillit të Sigurisë Kombëtare, e cila u zhvillua përmes platformës online ku në diskutim kanë marrë pjesë drejtuesit më të lartë të politikës.
Në këtë mbledhje, e cila u drejtuar nga Presidenti Ilir Meta, është diskutuar mbi masat e marra lidhur me mospërhhapjen e Covid 19, ndihmën dhe suportin ndaj njerëzve në nevojë dhe bizneseve, ndërsa theksi u vu te transparenca e veprimeve të Qeverisë dhe strukturat e angazhuara për përballimin e situatave.
Gjatë mbledhjes pati raportime nga ministrat dhe drejtuesit e institucioneve. Mësohet se raportimi është dhënë kryesisht nga Ministria e Shëndetësisë, mbi masat e marra në sistemin shëndetësor, trajtiimet e pacientëve, bazën materiale, mbrojtjen e mjekëve që përballen me pandeminë etj.
Po kështu pati raportime lidhur me angazhimin e strukturave policore dhe ushtarake për monitorimin e respektimit të masave që kufizojnë qarkullimin e mjeteve dhe qytetarëve.
“Masat që janë marrë dhe po merren nga Qeveria për përballimin e situatës në vend dhe parandalimin e përhapjes së mëtejshme të pasojave të COVID-19;
Përballimin e situatës ekonomike, nga efekti i sjellë nga përhapja e COVID-19;
Masat e marra për rikthimin e shtetasve shqiptare, të cilët kjo situatë i ka gjetur jashtë territorit të Republikës së Shqipërisë”, thuhet në njoftimin e Presidencës.
Sipas njoftimit, Kryeministri Rama dhe anëtarët e qeverisë informuan për masat e marra dhe për skenarët që do të duhet të përballohen në varësi të zhvillimit të situatës.
Ditën e djeshme qeveria miratoi dhe Gjendjen e Fatkeqësisë Natyrore, ku përcaktohet se “Fatkeqësi natyrore konsiderohen fatkeqësitë që shkaktohen nga dukuri natyrore ekstreme, që lidhen me tërmetet, përmbytjet dhe vërshimet e ujit dhe dukuri të tjera që ndikojnë në jetën e njerëzve, gjënë e gjallë, pronën, trashëgiminë kulturore dhe mjedisin.”
Mbledhja u njoftua dy ditë më parë nga ana e presidentit Meta, i cili u shpreh se forcat politike duhet të bashkohen pasi shëndeti dhe interesi i qytetarëve duhet të jetë mbi çdo interes partiak.
Mbledhja nisi në orën 12:00, ndërsa morën pjesë drejtuesit e mëposhtëm të institucioneve kryesore në vend:
Presidenti Meta
Kryeminsitri Rama
Ministrja e Mbrojtjes Olta Xhaçka
Ministrja e Financave Anila Denaj
Ministri i Shtetit Arben Ahmetaj
Kreu i Kuvendit Gramoz Ruçi
Ministrja e Shëndetësisë Ogerta Manastirliu
Ministrja e Drejtësisë Etilda Gjonaj
Kreu i PD-së Lulzim Basha
Ministri i Brendshëm Sandër Lleshaj
