Interesimi i Real Madrid për Kylian Mbappe, asnjëherë nuk është mbajtur i fshehtë, por për të siguruar firmën e 21 vjeçarit, prej kohësh ka rezultuar një mision shumë i vështirë. Kjo për vetë faktin, që francezi e ka konfirmuar veten si një superyll i padiskutueshëm në botën e futbollit dhe PSG nuk mund të heqë dorë lehtë nga ai.
Real Madrid ka nevojë për një numër “9” në të ardhmen e afërt që do të mund të alternohej me Karim Benzema dhe fokusi i “Los Blancos” është zhvendosur te sulmuesi norvegjez, Erling Haaland. Xhevahiri i Borussia Dortmund, pavarësisht se është vetëm 19 vjeç, tashmë ka dëshmuar plotësisht se mund të luajë në nivele shumë të larta. 40 golat e shënuar vetëm në këtë sezon e demonstrojnë atë gjerësisht si bomber.
Haaland, i cili menaxhohet nga Mino Raiola, është në radarët e Real Madridit, pasi i ka tejkaluar të gjithë pritshmëritë. Real Madridi mund ta bëjë atë një nga lojtarët më të fortë në perspektivë, përballë një shpenzimi prej 75 milionë eurosh (aq sa është dhe klauzola e largimit të tij), një shifër jo e pamundur, nëse konsiderojmë merkaton e sotme në futboll.
