Nga BoldNews.al
Pas rreth një jave në izolim në vilën e tij në Surrel, fjalori i kryeministrit Edi Rama ka ardhur duke u rënduar, ndërkohë që shqiptarët po vuajnë pasojat e kufizime drastike ekonomike dhe sociale, si pasojë e përhapjes së korona-virusit.
Kryeministri, siç duket, ka vendosur të vetë-karantinohet për dy javë, ndërkohë që izolimi nuk i ka shërbyer aspak për t’i marrë gjërat më ftohtë e më me përgjegjësi.
Si çdo ditë, me një frekuencë 3-4 orëshë nga njëra-tjetra, Rama shfaqet në dritaren e tij në rrjete sociale, duke shpërndarë mesazhe kërcënuese dhe pesimiste.
Në formën e një “ditari” të përditshëm, kryeministri Rama e nisi “luftën e tij” me armikun e padukshëm, duke përcjellë mesazhe të errëta, dita pas dite, tek qytetarët, duke i konsideruar si masa për të shpëtuar jetën e tyre:
– lani duart;
-mbylluni në shtëpi;
– do të gjobiteni;
– do të futeni në burg;
– do të rriheni nga policia;
– do të sulmoheni nga ushtria;
Tashmë që ka arritur në një jave në izolim në vilën e tij në periferi të Tiranës, Edi Rama lëshoi këtë të Hënë kumtin e tij të radhës:
– do të vdisni e trupat e pajetë do të merren me kamiona ushtrie e do të jetë vështirë për të gjetur vende varrimi.
Në çdo mesazh të Edi Ramës, përcillet shprehja se ai dhe qeveria e tij po bëjnë gjithçka. Por fajin për përhapjen e sëmundjen e kanë qytetarët. E bashkë me qytetarët, fajin e kanë mediat, opozita dhe “zhurmuesit” që përhapin panik, sipas opinionit të tij.
Natyrisht, ai nuk ka asnjë faj.
– Nuk ka asnjë faj që qindra milionë euro të Shëndetësisë kanë përfunduar në pak duar oligarkësh për koncensionet me firmën e tij dhe sistemi shëndetësor shqiptar është në pikë të hallit;
– Nuk ka asnjë faj, kur, kërkesave për marrjen e masave për të izoluar kufijtë, ndërkohë që korona-virusi po trokiste në derë, u përgjigjej me përqeshje dhe ironi;
– Nuk ka faj kur, zërave që e kritikonin për mungesën e masave për parandalimin e përhapjes së virusit, u përgjigjen me arrogancë se “çdo gjë ishte gati” dhe se “Shqipëria është e aftë të përballojë epideminë vrasëse”. Se sa gati ishte, kjo po shihet së fundmi që po kryen tenderave me urgjencë për blerjen e medikamenteve dhe pajisjeve minimale për stafin mjekësor.
– Nuk ka faj që, edhe kur, tashmë që qytetarët shqiptarë kanë nevojë më shumë se kurrë për forcimin e kapaciteteve në Shëndetësi, sërish qindra milionë euro shkojnë për llogaritë e oligarkëve të inceneratorëve e investimeve të tjera të “oligarkëve”.
– Natyrisht, ai nuk ka asnjë faj, megjithëse po vepron me bindje kundër alarmit ulëritës të Organizatës Botërore të Shëndetësisë- “testoni, testoni, testoni”.
Në çdo ditë, kryhen 3—50 testime në ditë, ndërkohë që nevojat janë për shumë e shumë herë më të larta. Mjekët, heronjtë e vërtetë, janë të detyruar të veprojnë me aq bazë materiale sa u jepet në dispozicion nga “mjeshtërit e tenderave”.
– Natyrisht, nuk ka asnjë faj që qeveria e tij është tërësisht e paaftë të hartojë një plan për të siguruar vijimin e zinxhirit ekonomik të vendit.
Fajin e kanë qytetarët, të cilët, të çoroditur nga fashat orare të liri-qarkullimit që ndryshojnë, dynden në dyqanet e ushqimeve dhe farmaci për t’u furnizuar me gjërat më bazike.
Nga vila e Surrelit, ku ushqimet dhe çdo lloj lënde që shërben për të plotësuar nevojat biologjike të tij e të familjes së tij, Rama nuk arrin ta kuptojë se njerëzit duan të jetojnë përditë.
Qytetarët shqiptarë, në këtë luftë me virusin, duhet të përballojnë edhe stresin e një njeriu që ka zgjedhur të qëndrojë i izoluar, por ndërkohë luan edhe me pushtetin si një lojë “tavlle” – lëvizjet e radhës përcaktohen nga hedhja e zareve.
Edi Rama deklaroi nga dritarja e tij virtuale se “kjo është java më e vështirë” për të gjithë. Natyrisht, kjo është një nga ato javët më të vështira për shqiptarët.
Jo vetëm për shkak të progresionit rritës të pacientëve të prekur me Cov-19. Por edhe për një arsye më “madhore” të kryeministrit, Edi Rama.
Ai është në javën e dytë të “vetëkarantinimit”. Gjendja e tij psikologjike, ashtu si e të gjithë shqiptarëve që po qëndrojnë të izoluar, po rëndohet. Por, ndryshe nga qytetarët, që po gjejnë forca dhe po mbështesin njëri-tjetrin, kryeministri Rama ka vendosur të shfaqet si “plaka zevzeke e lagjes”, duke sharë e mallkuar.
Duroni edhe një javë! Edi Rama do e mbylli vetë-karantinimin dhe do të ajrosë mendimet.
