Numri i të prekurve me koronavirus në Shqipëri, referuar shifrave zyrtare të Ministrisë së Shëndetësisë dhe Mbrojtjes Sociale, ka arritur mesditën e sotme në 104 persona, 49 prej të cilëve janë shtruar në spitalin Infektiv në Tiranë.
Ndërkohë harta e përhapjes së koronavirusit është shtuar me Vlorën dhe Shkodrën, përkatësisht me 4 raste dhe 1 rast, ndërsa Tirana vijon të kryesojë listën me numrin më të lartë të të infektuarve. Pas Tiranës renditet Fieri, me 12 raste të zbuluara.
Shefja e Departamentit të Parandalimit dhe Kontrollit të Sëmundjeve Infektive në ISHP, Silva Bino, informoi në detaje për situatën e COVID-19 në Shqipëri, ku sipas saj, janë shënuar 2 humbje jete në 24 orët e fundit:
Një 71 vjeçar me disa sëmundje bashkëshoqëruese dhe një 43 vjeçar, i cili kishte obezitet.
Kështu ka shkuar në 4 totali i qytetarëve që kanë humbur jetën, të prekur me COVID-19.
Ndërkohë janë shëruar 5 pacientë të shtruar në spitalin, te cilët kanë rezultuar me të dy testet të negativizuara për COVID-19.
Përhapja e rasteve
• Tiranë 68 qytetarë
• Durrës 7 qytetarë
• Lushnje 2 qytetarë
• Elbasan 2 qytetarë
• Fier 12 qytetarë
• Rrogozhinë 2 qytetarë
• Kavajë 3 qytetarë
• Korcë 3 qytetarë
• Vlorë 4 qytetarë
• Shkodër 1 qytetarë
