Ndërsa numri i të prekurve me Covid 19 në Shqipëri zyrtarisht, deri në mesditën e së dielës, ka arritur në 89 persona, numri i viktimave ka shkuar në 5 persona, tre nga të cilët humbën jetën në 24 orët e fundit.
Të tre viktimat e orëve të fundit ishin në terapi intensive, pra me frymëmarrje të drejtuar, ndërsa 43-vjeçari nga Kavaja, i cili humbi jetën mëngjesin e sotëm, nuk ka pasur sëmundje të mëparshme përveç mbipeshës.
Dy personat e tjerë që humbën jetën në orët e fundit janë 71 vjeçari nga Kuçova dhe 61 vjeçari nga Tirana.
Përveç 43 vjeçarit nga Kavaja, 4 viktimat e tjera, që nga momenti që koronavirusi u shfaq në Shqipëri, kanë pasur sëmundje të tjera kronike.
Harta e përhapjes së Covid 19 në Shqipëri ka pësuar një rritje, duke shtuar këtu edhe Korçën me 3 raste dhe Vlorën me 4 raste.
Mjekë të infektivit pohojnë se gjendja shëndetësore e pacientëve me Covid 19 pëson një përkeqësim mes ditës së 6 dhe të 9, gjë që ende nuk shpjegohet nga ana e mjekëve.
Sipas të dhënave spitalore, gjendja shëndetësore e pacientëve në Infektiv vlerësohet mesatare deri në mesatarisht e rëndë, përveç rasteve kur ka frymëmarrje të drejtuar.
Deri më tani 3 pacientë të kuruar në Infektiv konsiderohen të rikuperuar, por që i duhet të qëndrojnë në karantinë edhe për 14 ditë, për të parë ecurinë e tyre shëndetësore.
