Mjeku i njohur, Tritan Kalo u është drejtuar me një tjetër mesazh qytetarëve shqiptarë lidhur me parandalimin e përhapjes së koronavirusit.
Kalo thekson se vetëndërgjegjësimi mbetet ende i çalë, prandaj ai apelon të zbatohen masat e marra dhe qytetarët të qëndrojnë në shtëpi.
“Vetëndërgjegjësimi mbetet ende i çalë. Ju kemi informuar dhe kurrë nuk do të lodhemi duke ju informuar. Ekipi punëmadh e fjalëpak i Shërbimit të Sëmundjeve Infektive po ju gjendet pranë në çdo minutë të ditës. Qëndroni në shtëpi dhe respektoni rregullat e distancimit social, për t’i ngadalësuar vrullin e përhapjes COVID-19. Pak ose më mire, aspak politikë dhe politizim e politikë të gjithçkaje”, shprehet ai.
Mjeku apelon për bashkëveprim dhe bashkëpunim për të kapërcyer këtë “flamë botërore” me sa më pak humbje njerëzore.
“Koha lyp vetëm e vetëm bashkëveprim dhe bashkëpunim, për të kapërcyer me sa më pak humbje njerëzore këtë “flamë botërore”. Shuplakat tona ndaj sistemit apo politqenërve të këtyre 30 viteve demon-kraci do të kemi mundësi t’i përdorim që në zgjedhjet më të afërt. Ne ndërkohë më shumë dashuri e respekt për njeri tjetrin. Sa më pak ndasi në mendimet dhe në qëndrimet tona, përkundrejt armikut të përbashkët, tinzarit COVID-19”, apelon Kalo.
“Pas fitores së kësaj beteje, shpresoj dhe uroj që të kemi vullnetin dhe dëshirën për të bërë ndryshimet e duhura në këtë sistem të dështuar, që nga mënyra e instalimit të tij po ashtu edhe përgjatë 30 viteve të një tranzicioni asfiksues, për burimet njerëzore, natyrore dhe zhvillimore të Nënlokes Shqipëri….Punë ,përkushtim, e profesionalizëm nga kushdo dhe kudo….E vetmja PPP dobiprurëse për kapërcimin e kësaj situate, optimizmi ynë kërkon mbështetjen dhe mirëkuptimin nga të gjithë ju….Së bashku do t’ia dalim”, shprehet ai.
