Singapori, Tajvani dhe Hong Kongu po dëshmojnë valë të freskëta të infeksioneve me koronavirus. Singapori raportoi 23 raste të reja mbrëmjen e së martës, numri më i lartë në një ditë që nga fillimi i epidemisë.
Tajvani regjistroi një numër dyshifror me 10 raste infeksioni, duke e çuar gjithsej në 77. Hong Kongu pati pesë raste të reja, kur një ditë më parë kishte regjistruar nëntë, numri më I lartë që nga 9 shkurti. Singapori, Tajvani dhe Hong Kongu, të cilët u goditën që herët nga koronavirusi për shkak të lidhjeve të ngushta ekonomike e sociale me Kinën, janë lavdëruar për kontrollin efektiv të përhapjes së virusit me një përgjigje të shpejtë dhe agresive.
Tani, ata po përballen me sfida të reja, në kushtet kur rastet e koronavirusit rriten në Evropë dhe Lindjen e Mesme dhe udhëtarët që kthehen prej andej sjellin rreziqe të reja.
“Problemi me këtë virus është se është shumë i paparashikueshëm. Ne nuk e dimë se kush do të jetë epiqendër në të ardhmen. Nuk është i sigurtë asnjë vend derisa e gjithë bota nuk është e sigurtë” – ka thënë Paul Anantharajah Tambyah, presidenti i Shoqatës së Mikrobiologjisë Klinike dhe Infeksionit për Azi-Paqësorin. Sipas Universitetit Johns Hopkins, në nivel global, rastet e infeksionit u rritën në më shumë se 182,000 të martën dhe numri i vdekjeve arriti në 7.155. Rritja e shpejtë ka forcuar edhe më shumë masat dhe ndalimet e udhëtimeve.
Administrata Trump u bëri thirrje amerikanëve që të ndërpresin udhëtimet dhe të shmangnin tubimet për më shumë se 10 persona, pasi infeksionet dhe vdekjet jashtë Kinës tejkaluan ato brenda. Gjermania vendosi kufizime të gjera në udhëtime dhe jetën publike, ndërsa Franca urdhëroi një karantinë mbarëkombëtare.
Tajvani raportoi rastin e parë në fillim të janarit dhe shumë shpejt zbatoi rregullat e karantinës për ardhjet nga Kina, Hong Kongu dhe Macau. Kjo e mbajti numrin e përditshëm të infeksionit të ishullit në nivel njëshifror për dy muaj – derisa qendra e pandemisë u zhvendos nga Azia. Tre ditët e kaluara kanë sjellë më shumë se 30% të rasteve të përgjithshme të Tajvanit, shumica prej tyre përfshijnë udhëtarët që ktheheshin nga pushimet në vendet e Evropës. “Ju mund të shihni nga situata aktuale – krahasuar me valën e mëparshme – se ajo erdhi shumë më shpejt,” tha të hënën Ministri i Shëndetësisë dhe Mirëqenies së Tajvanit Chen Shih-chung. Grupimet e fundit të pacientëve Taiëanese përfshinin nëntë persona që ktheheshin nga një pushim në Turqi me të njëjtin grup turneu, duke provokuar një protestë në mediat sociale për udhëtimet në kohë pandemie globale.
Të martën, Tajvani zgjati rregullat e vetë-karantinës për të mbuluar udhëtarët që vijnë nga SHBA dhe Japonia dhe një numër vendesh të Azisë Juglindore. Z. Chen, zyrtari i lartë shëndetësor i ishullit, këshilloi me forcë qytetarët të shmangin udhëtimet e panevojshme në ato vende. Ai tha që njerëzit që me vetëdije e injorojnë paralajmërimin e udhëtimit nuk do të kenë të drejtë për subvencione qeveritare gjatë karantinave të tyre 14-ditore dhe emrat e tyre do të bëhen publikë.
Singapori mbylli kufijtë me Kinën më 1 shkurt, rreth një javë pasi Kina tha që do të mbyllte qytetin e Ëuhanit, ku u raportuan infeksionet e para koronavirus. U ngrit një task forcë kombëtare për të koordinuar reagimin, bëri kërkime të hollësishme për gjurmimin e kontakteve dhe imponoi karantina të rrepta. Në javën e kaluar, pasi rastet e importit u rritën, autoritetet kufizuan hyrjen për vizitorë nga shumë vende të Evropës, Koreja e Jugut dhe Irani dhe vendosën karantina dy-javore për banorët dhe vizitorët afatshkurtër nga Azia Juglindore.
Udhëheqësi i Hong Kongut Carrie Lam tha që të ardhurit nga të gjitha vendet e huaja do të futen në karantinë të detyruar në shtëpi për dy javë duke filluar nga e enjtja. Në vendet e tjera të rajonit të Azi-Paqësorit, numri i rasteve po ashtu po rritet. Banka Kombëtare e Australisë, ndaloi punën në selinë e saj në Melburn pasi një punonjës u testua pozitiv. Të dhënat e Johns Hopkins tregojnë se Australia ka 377 raste të konfirmuara infeksioni. /WSJ
