Nga Boldnews.al
Tre ditët e para i more lehtë kryeministri ynë, aty i mbyllur në kullën tende në Surrel e ndërtuar me beton special dhe e arreduar aq bukur sipas shijeve. U mërzite, por ti ia dole. Kishe internet dhe komunikove nga katër deri në shtatë herë në ditë me qytetarët.
Virusi të vinte “anash”, por ti je i zgjuar Edi ynë, u mbylle në shtëpi, as ministreshave nuk u zgjate dorën, deputetëve jo e jo, sërish ti ia dole, ashtu me kurajon e madhe dhe fjalët e bukura që rrëfen edhe kur vendin e ka zënë kjo kolerë e shekullit të ri, coronavirusi.
Për tre ditë i çorientove qytetarët me masat e tua që nuk kishte nevojë për akte protokollare të qeverisë dhe shtetit fuksional, por vetëm një copëz telefon dhe gishtat e tua të shpejtë ti i ktheve statuset e rrjeteve të tua sociale në vendime. Je i madh, vetëm ti mund ta bësh këtë, të të vijnë anash ata kryeministrat e Italisë, Francës, Belgjikës, Austrisë apo edhe vetë kancelarja gjermane që shkon në zyrë.
I mbylle njerëzit në shtëpi si masë për të parandaluar përhapjen e coronavirusit. Nuk deshe dhe nuk do tia dish nëse kanë apo jo të hanë, por ti ia dole, si ushqim i dhe jo tre, por katër deri në shtatë “vafte” propagandë. Kaq do mileti, e ti ia dole.
Por vetëm tre ditë zgjat edhe barku i bushatisur. Kushdo që mendon se ti nuk do ia dalësh që tani e ka gabim. Ti e di më mirë se kushdo që ekonominë e kë bërrnut, shëndetësinë të infektuar prej shtatë vitesh nga “virus koncesioni” dhe qeverinë të fryrë nga tendera që mban erë korrupsion, aq sa ndihet deri në Bruksel apo Uashington. Por tia prap ia dole, por edhe do ia dalësh.
Për të mos i dërguar qytetarët e prekur nga coronavorusi nëpër spitale së pari nuk po u bën analizat, ndonëse kreu I OBSH-së shprehej, teste, teste, teste…! Po Ku kupton ai i gjorë nga pandemitë…. Qytetarët shqiptarë i ke mbyllur në shtëpi dhe po u jep “receta” nga rrjetet sociale duke u mbushur mendjen se është thjeshtë virozë e stinës. I bien numrit 127 për ndihmë mjekësore, por të thonë bëj durim, jemi në luftë!
Je mjeshtër kryeministri ynë, sepse ti e di fare mirë që nëse do përplaseshin të gjithë të prekurit nëpër spitale vetëm 130 aparatë respiratore (intubuese) ka vendi, ndaj përfundimisht je i madh! Ia dole t’i fusësh në burgun e injorancës dhe luftës me “kompresa” të lagura me uthull rrushi.
Edhe për një copë bukë më shumë e ke zgjidhjen. Ke një grusht oligarkësh që kanë vënë kaq shumë dhjamë sa nuk e kanë për fare problem që ti shpërndajnë popullit të uritur një kafshatë, por me kusht që para se të marrin “tollonin” të të falenderojnë ty që vure dorën në zemrën tënde të madhe.
Bota po lufton në dy fronte; në shëndetësi dhe në ekonomi, por ti nuk ke nevojë të prekësh atë arkën e shtetit për këto “vogëlsira”, ne na ngop me propagandë, çfarë duhet zhvillimi dhe rimëkëmbja?! Liderë koti Macron, Merkel, Trump dhe të tjerë që në këto kohë të vështira nuk kursejnë asgjë për jetën e qytetarit si pacient sot dhe si qytetar i shëruar nesër.
Kurajo kryeministër, mos harro se të janë lodhur gishtat duke shkruar, merre edhe ndimësin e pashembull si krahun tënd të djathtë, Lali Erin. Ai po ndihet disi i veçuar, por afroje më tepër, do ia shohësh hairin.
Edhe ujin që spërkat bulevardin ta shet për “detergjent special dezinfektues”, edhe pse Tirana nuk ka as ujë për të larë duart. Po fundja çfarë duhet uji kur ke propagandën. Kurajo, duro dhe ca, bëj siç ke bërë në shtatë vite, ti do ia dalësh….!
