Kreu i Partisë Demokratike, Lulzim Basha thotë se propozimet e opozitës për ta përballuar krizën aktuale të shkaktuar nga koronavirusi, nuk janë për qëllime politike apo elektorale.
Basha tha për News 24, se përshëndet tenderin e sotëm të Ministrisë së Shëndetësisë për pajisjet respiratore, ndërsa pati edhe një thirrje për bankat e nivelit të dytë.
Basha: Dua t’ua them fare qartë bankave të nivelit të dytë që një pjesë e mirë e stabilitetit është tashmë në dorën e tyre dhe ju kërkoj të sillen me përgjegjësi. Por, kjo masë është e pamjaftueshme. Tani duhet të rishikohet buxheti i shtetit 2020, të rishikohen fondet, me theks tek mjekësia, shtresat në nevojë, dhe masat lehtësuese. Është edhe një paketë masash e kostuar për ekonominë e Shqipërisë. Në vend të debatit dhe batutave që nuk sjellin ushqim për shqiptarët, të fokusohemi tek kriza. Ekspertiza jonë ekonomike është në dispozicion të qeverisë, që nuk janë gjë tjetër vetëm se masat që po merr bota për t’i dhënë frymëmarrje ekonomisë.
Nëse masat ndërmerren në kohë, përfitimi i tyre është më i madh për qytetarët. Propozuam në atë kohë që familjet të jenë në kontenierë dhe jo në çadra, por tani jo vetëm janë në çadra por rrezikohen nga pandemia. Është më mirë të mendohet jo sot për sot, por sot për dy javë më vonë. Të mendojmë për t’u bërë gati si të përballojmë të gjitha pasojat.
Ne nuk do të lodhemi duke propozuar, janë për çdo shqiptar. Nuk dua asnjë çast të jap përshtypjen më të vogël se këto propozime po i bëjmë për të vënë në vështirësi qeverinë apo për të nxjerrë zbuluar kreun e qeverisë, bëhet për diçka që shkon përtej PD-së dhe PS-së. Kur vjen fjala për jetën e qytetarëve, politika e përditshme ndalet. Përgjegjësitë e qeverisë janë shumë të mëdha dhe opozita ka përgjegjësitë e veta dhe çfarë mund të bëjmë së bashku për të mirën e qytetarëve tanë.
Ka një task forcë që është task forca e qeverisë. Ka një opozitë që ka detyra të qarta; transparenca, e cila është miku ynë më i mirë kundër panikut. Së dyti llogaridhënia dhe së treti propozimet. Presidenti ka detyrat e veta. Secili duhet të bëjë detyra e veta. Ftesa ime për qeverinë është të bëjë detyrat. U hap tenderi sot, e përshëndes. Nuk dua ta sulmoj pavarësisht se me 1 javë vonesë. Më mirë vonë se kurrë. Kjo është e domosdoshme për shëndetin e qytetarëve. Duhen marrë masa për të mbrojtur mjekët. I bëj thirrje OBSH-së në Tiranë që të ndërmerren sa më shumë materiale testuese.
