Nga BoldNews.al
Kryeministri Edi Rama është shndërruar gjatë ditëve të fundit në “higjenistin nr.1” të Shqipërisë, nëpërmjet thirrjeve të tij drejtuar qytetarëve “Lani duart”, si një ndër masat më të domosdoshme për parandalimin e përhapjes së virusit Cov-19.
Në apelin e kryeministrit “higjenistit”, natyrisht, presupozohet që uji duhet të jetë i pastër, pa baktere, që të kryejë më së miri pastrimin e duarve dhe pjesëve të dukshme të trupit që mund të bien në kontakt me korona-virusin.
Por, a është i pastër uji, i cili konsiderohet “i pijshëm”, që vjen në rubinetat e qytetarëve, sidomos atyre të Tiranës? Banorët e kryeqytetit e kanë shumë të qartë cilësinë e ujit që vjen në rubinetat e tyre. Janë shumë të rralla, në mos zero familje kryeqytetase, që përdorin për të pirë ujin që u vjen nga Ujësjellësi i Tiranës.
Arsyeja është shumë e thjeshtë-askush nuk i zë besë cilësisë së ujit që qarkullon në tubat e Ujësjellës-Kanalizime Tiranë.
Aq e vërtetë është kjo gjë, sa edhe vetë kryetari i Bashkisë së Tiranës, Erion Veliaj, është i bindur dhe merr masa që të mos pijë ujë nga rubineti i zyrës së tij.
Kjo qasje e “Lali Erit”, emërtim me të cilin preferon të përkëdhelë sedrën kryebashkiaku i Tiranës, konfirmohet edhe nga një tender i shpallur së fundmi nga institucioni që ai drejton.
Bashkia e Tiranës ka shpallur tenderin për “blerje uji të pijshëm” për administratën e institucionit. Vlera e tenderit është rreth 20 milionë lekë (të vjetra).
Shuma nuk është e madhe, krahasuar me tenderat multi-milionësh të zhvilluar nga Bashkia e Tiranës. Megjithatë, është domethënës për cilësinë e ujit që vjen në rubinetat e kryeqytetit, duke nxjerrë bllof edhe propagandën e Veliajt për rritjen e cilësisë së ujit në Tiranë.
Erion Veliaj prezantoi furnizimin 24 orë me ujë të pijshëm si një ndër tezat e tij kryesore në fushatën e parë për kryetar Bashkie, në vitin 2015. Në atë fushatë, Veliaj premtoi se ky premtim do të përmbushej brenda mandatit të tij të parë 4-vjeçar.
Që prej atij premtimi, kaluan “shumë ujëra”, por realizimi mbeti thjesht në letër. Në fushatën e radhës, në përfundim të së cilës ai mori mandatin e dytë pa garë, Veliaj iu rikthye premtimit të tij për ujë të pijshëm 24 orë. Në çdo rast, ai e theksonte termin “ujë të pijshëm”.
Në janar 2019, kur Erion Veliaj kishte nisur fushatën për mandatin e dytë, ai deklaroi gjatë një vizite në Ujëmbledhësin e Bovillë se po kryeshin investime të rëndësishme, të cilat do të siguronin ujë të pijshëm 24 orë për banorët e Tiranës brenda 5 vitesh, pra diku rreth vitit 2024.
Deri në arritjen e këtij qëllimi, natyrisht, puna do të zhvillohej faza-faza, ku, së pari do të niste furnizimi me “ujë të pijshëm” me orare gjithnjë e në rritje, deri sa të arrihej tek 24-orëshi i premtuar.
Por, duket se premtimet e Lali Erit do të vijojnë të jenë të tilla. Ai nuk ka arritur të sigurojë ujë të pijshëm për administratën e tij, e cila i ka zyrat në qendër të Tiranës.
Nisur nga kjo premisë, duke e qartë se qytetarët e tjerë, në zonat rrethore nga qendra drejt periferisë, as nuk duhet të shpresojnë për rritjen e cilësisë së ujit në kryeqytet së shpejti.
Megjithatë, kryeqytetasit duhet të durojnë në çdo hapësirë publike thirrjet e “higjenistit” Edi Rama: “Lani duart!”.
