Pak ditë pasi Banka e Shqipërisë deklaroi se do të ngrihej pagesa e kredive për tre muaj, në një sqarim të fundit bëhet e ditur se përfitues do të jenë vetëm bizneset dhe individët të cilët do të kenë vështirësi paguese për shkak të situatës me koronavirusin.
Por edhe në këtë rast do të duhet që kredimarrësi të realizojë marrëveshje me institucionin financiar që kanë marrëdhënien.
“Për të bërë të mundur këtë nevojitet që të gjithë ata kredimarrës, biznese dhe individë, të cilët preken ekonomikisht dhe financiarisht nga kjo situatë, dhe që dëshirojnë të përfitojnë nga kjo lehtësi e ofruar, të kontaktojnë me institucionin financiar (bankë, jobankë, shoqëri kursim-krediti) me të cilin kanë marrëdhënien e kreditimit dhe të informojnë këta të fundit mbi këtë kërkesë”, thuhet në deklaratën për mediat të Bankës së Shqipërisë.
Madje më tej nënvizohet se të gjtihë ata që nuk preken nga situata me koronavirusin do të duhet të realizojnë pagesën.
“Kredimarrësit, aftësia paguese e të cilëve nuk preket apo dëmtohet nga kjo situatë duhet të vijojnë normalisht shlyerjen e detyrimeve të tyre me këto institucione”, thuhet më tej në deklaratë.
Në çdo rast Banka e Shqipërisë thekson në rast të marrëveshjes mes kredimarrësit dhe kredidhënësit bëhet fjalë vetëm për ngrirje dhe jo falje.
Ndërsa masat për riskedulimin e kësteve të kredisë kanë hyrë në fuqi nga data 13 mars dhe do të zgjasin deri në 31 maj.
