Diego Maradona ka bërë të qartë shqetësimin e tij, për sa i përket qasjes së njerëzve në Argjentinë kundër luftës ndaj coronavirusit.
Argjentina aktualisht nuk është në situatën në të cilën ndodhet Europa apo SHBA-ja, por sidoqoftë Maradona është i shqetësuar për vështirësinë në përhapjen e informacionit të dobishëm për publikun.
“Disa tallen me këtë situatë, por e vërteta është se të shtunën e kaluar askush nuk po fliste për një pandemi këtu; të gjithë takoheshim me puthje dhe stadiumet ishin të mbushur, është e vështirë të edukosh një vend në 15 minuta. Ky problem zgjidhet me edukim, bindje dhe respekt. – shpjegoi Maradona.
Ndërsa ka kaluar shumë kohë në Itali teksa luante për Napolin, Maradona kishte edhe disa fjalë për vendin, duke thënë: “Kam jetuar në Napoli për shtatë vite, kam një familje atje, shumë njerëz që i dua dhe më duan. Italia është pjesë e jetës sime dhe dua t’i çoj një mesazh mbështetjeje”.
“Çdo kush atje e kuptoi që duhet të qëndrojnë në shtëpitë e tyre. Shpresoj që këtu në Argjentinë, njerëzit të reagojnë në kohë”. – përfundoi Maradona për “Marcan”.
