Deputetët socialistë, anëtarë të Komisionit të Shëndetësisë, kallzuan penalisht në Prokurorinë e Përgjithshme, ish-kryeministrin Sali Berisha, për atë që ata e konsiderojnë si “përhapje paniku”.
Kreu i Grupit Parlamentar socialist, Taulant Balla, tha se është depozituar në Prokurorinë e Përgjithshme, kallzimi penal i deputetëve të Komisionit të Shëndetësisë në Kuvendin e Shqipërisë, për veprën penale “Përhapja e informatave të rreme që ngjallin panik”, parashikuar nga Neni 267 i Kodit Penal, kundër shtetasit Sali Berisha, i biri i Ram dhe Sheqere, i datëlindjes 15.10.1944 lindur në Tropojë e banues në Tiranë.
“Ne dhe publiku shqiptar kemi besimin se institucioni i Prokurorisë, në bashkëpunim me gjykatën dhe kushtëzimet proceduriale, do të veprojë në mënyrë të shpejtë, efikase dhe pa ngurim, dhe presim me vëmendjen maksimale dhënien rrugë të këtij kallëzimi sipas procedurës përkatëse.
Çdo veprim i Drejtësisë në respekt të ligjit, nuk është thjeshtë një përgjigje ndaj veprimeve të qëllimshme panikuese të të akuzuarit, por është edhe shprehje e ushtrimit të detyrës institucionale dhe qytetare në mbrojtje të jetës dhe sigurisë publike, si dhe të vlerave e parimeve të lirisë së fjalës, demokracisë funksionale dhe shtetit të së drejtës”, shprehet Balla.
Berisha ka postuar në rrjetet sociale denoncime lidhur me situatën e koronavirusit, duke hedhur akuza ndaj Qeverisë dhe Kryeministrit.
