Është konfirmuar se një lojtar profesionist në Gjermani, ka rezultuar pozitiv me coronavirus-in. Mbrojtësi i Hannover 96, Timo Hubers, iu nënshtrua testit pasi kishte ndjekur një eveniment lokal, ku ai mësoi se kishte qenë në kontakt me një person i cili ishte i infektuar me Covid-19.
Klubi i cili militon në Bundesliga 2, njoftoi se qendërmbrojtësi, 23-vjeçar, ndaj testit ka rezultuar pozitiv por nuk ka pasur kontakt me shokët e skuadrës dhe aktualisht ndodhet në karantinë. Pavarësisht se mbart virusin, lojtari, nuk shfaq asnjë simptomë të sëmundjes.
Për të marrë masat e duhura e gjithë skuadra e Hannover-it dhe stafi teknik i janë nënshtruar testeve përkatëse, megjithëse momentalisht vazhdojnë të stërviten sipas programit.
