Buletini i përditshëm i statistikave të koronavirusit në Itali sjell të dhëna të frikshme për numrin e të vdekurve.
Por një vend shumë i prekur nga koronavirusi sjell një panoramë të ndryshme. Koreja e Jugut ishte vendi i dytë me më shumë të prekur për një kohë, derisa u parakalua nga Italia.
Një ditë më parë, Koreja e Jugut raportoi se ka regjistruar 7755 të infektuar nga koronavirusi, por vetëm 60 të vdekur.
Për krahasim, në Itali numri i të prekurve një ditë më parë ishte 10149, kurse numri i të vdekurve ishte 631, pra dhjetë herë më shumë.
Si shpjegohet kjo diferencë?
Gazeta ‘Corriere della Sera’ shkruan se ekspertët e Asian Times janë munduar të gjejnë një përgjigje.
E dhëna e parë befasuese në Korenë e Jugut lidhet me numrin e testeve diagnostikuese të kryera: plot 20 mijë në ditë me rezultate të shpejta, nga 6 deri në 24 orë. Testimet kryhen me kosto të ulët prej 120 eurosh, të mbuluara shpesh nga siguracionet, dhe për pacientët pozitivë, ai është falas. Në këtë mënyrë nuk ka asnjë arsye për të dyshuar për raste të fshehura.
Ndryshe nga Kina dhe Italia, të cilët adoptuan strategjinë e izolimit të rajoneve të tëra, Koreja e Jugut ka një qasje më liberale, duke mos izoluar as qytetin Daegu, aty ku shpërtheu epidemia. Në vend të kësaj, qeveria u fokusua në modelin e testimeve të shumta, pjesëmarrjes së publikut dhe informacionit të hapur. Po ashtu qeveria besoi te disipina ekstreme e popullsisë.
Të dhënat e çdo pacienti të infektuar publikohen në disa faqe të veçanta në internet. Po ashtu publikohet çdo e dhënë për lëvizjet e tyre, të të afërmëve në 14 ditët e fundit- të gjurmuara nga celularët, kartat e kreditit, kamerat e sigurisë, etj. Ndoshta mund të keni dëgjuar se kjo strategji ka ngritur shqetësime për privacinë, por ajo mundësoi që popullsia të informohen për njerëzit potencialisht në rrezik, duke bërë që ata t’u nënshtrohen testimeve.
Por ishte shpejtësia e diagnostikimit që e ka mbajtur kaq të ulët nivelin e vdekshmërisë me vetëm 0.77 përqind, në krahasim me 3.4 përqind në nivel global. Kjo për shkak se vetëizolimi i hershëm është trajtimi më efektiv kundër sëmundjes.
Një tjetër fakt interesant është se në Korenë e Jugut janë prekur më shumë femra, kryesisht nën 40 vjeç. Kurse në Itali janë prekur më shumë meshkujt. Duhet thënë se koronavirusi vret më shumë meshkujt, sidomos ata në moshë të madhe.
