Mbrëmjen e djeshme, Josip Iliçiç, pati një ndeshje historike, teksa shënoi plot 4 gola ndaj Valencias duke vulosur praninë e Atalantës në çerekfinalet e Ligës së Kampioneve.
Skuadra nga Bergamo, ndaj spanjollëve u kualifikua me rezultatin e përgjithshëm 8-4, dhe arritja në çerekfinale është rezultati më i mirë në të gjithë historinë e klubit.
Pas ndeshjes duke folur për “Sky Sport Italia”, Iliçiç deklaroi se Atalanta tashmë nuk është më surprizë ndërsa në lidhje me formën personale tha se për momentin po e shijon futbollin e luajtur dhe se tashmë në moshën 32- vjeçare ndihet në kulmin e karrierës së tij.
Atalanta në çerekfinale? “E thashë pas ndeshjes së parë se Atalanta nuk është më surprizë. Kemi zhvilluae sezone fantastike për disa vite tani dhe objektivi ynë është që të provojmë që e meritojmë të jemi në këtë fazë të kompeticionit”.
4 gola ndaj Valencias? “Me të vërtetë ndjej se me kalimin e moshës po bëhem më i mirë, e kuptoj më mirë lojën. Në fushë po argëtohem. Është për të ardhur keq që fansat nuk janë të pranishëm por do të vazhdojmë t’i kënaqim ata me rezultatet tona”.
Iliçiç po përjeton sezonin më të mirë në karrierën e tij, teksa deri më tani ka shënuar 21 gola në 29 paraqitje në të gjitha kompeticionet.
