Federata Shqiptare e Futbollit ka dalë me një deklaratë zyrtare, ku ka bërë të ditur se të gjitha aktivitetet sportive në vend do të luhen pa praninë e tifozëve.
Ditën e djeshme kryeministri Rama deklaroi se të gjitha aktivitetet ku mblidhen njerëz do të pezullohen, duke përfshirë këtu edhe ato sportive. Ndërsa ditën e sotme FSHF-ja ka dalë me një komunikim zyrtar, ku thuhet se të gjitha ndeshjet do të luhen sipas programit, por pa praninë e tifozëve.
Aktualisht në Shqipëri janë regjistruar 6 persona të prekur nga koronavirusi, duke bërë që të shtohen masat e nevojshme për parandalimin e përhapjes së sëmundjes.
Njoftimi i FSHF-së:
“Komiteti i Emergjencës në Federatën Shqiptare të Futbollit pas mbledhjes së jashtëzakonshme të zhvilluar ditën e sotme dhe komunikimeve zyrtare me Këshillin e Ministrave ka vendosur të njoftojë klubet se aktiviteti futbollistik në Shqipëri do të vijojë sipas kalendarit zyrtar të parashikuar nga Sektori Garave, por ndeshjet do të zhvillohen me dyer të mbyllura.
Kjo masë është marrë pas vendimit të djeshëm të Ministrisë së Shëndetësisë dhe Mbrojtjes Sociale, si dhe në respekt të ruajtjes së shëndetit publik të sportdashëve dhe të gjithë personave të përfshirë në garën futbollistike në vend.
Federata Shqiptare e Futbollit kërkon mirëkuptimin e të gjithë palëve, si një vlerësim objektiv për situatën në cilën ndodhet vendi”.
