Nga Boldnews.al
Erion Veliaj, një nga zyrtarët më të prekur nga “video-mania”, ka shpërndarë në rrjete sociale masat e marra, sipas tij, për dezinfektimin e autobusëve të transportit publik në Tiranë, si një ndër masat parandaluese për përhapjen e “Covid-19”.
Në dy video të njëpasnjëshme, të shpërndara në orët e fundit në rrjete sociale, Veliaj prezanton masat për pastrimin e autobusëve, duke synuar të fitojë disa “merita” edhe në këto ditë të vështira për qytetarët.
Veliaj, si një politikan që promovon lëvizjet me biçikletë, sugjeron lëvizjen e qytetarëve me dy-rrotakë apo edhe të ecin në këmbë.
Këto këshilla janë pozitive, por Veliaj nuk është thjesht qytetar që shpërndan fletushka. Ai është kryetar i Bashkisë dhe ka përgjegjësi, ndër të tjera, edhe për mbarëvajtjen e punëve publike.
Përtej show-t me foto e video, “Lali Eri”, siç preferon të përkëdhelet, nuk ka marrë asnjë masë konkrete për të shmangur rrezikun e përhapjes së virusit.
Ai, në video-propagandat e tij, sugjeron që qytetarët të shmangin grumbullimet masive, përfshirë edhe autobusët, por nga ana tjetër nuk ka nxjerrë asnjë urdhër administrativ për të kufizuar tubimin e qytetarëve në mjetet e transportit publik.
Urdhëri nr.132, dt.08.03.2020 i Ministres së Shëndetësisë parashikon, ndër të tjera, se anulohen edhe grumbullimet masive. Mjediset e brendshme të autobusëve urbanë janë ndër vendet me përqëndrim të madh të grumbullimeve masive.
Bashkia e Tiranës është përgjegjëse për disiplinimin e linjave urbane në kryeqytet. Ajo ka miratuar hartën e qarkullimit dhe frekuencën e lëvizjeve të tyre gjatë ditës në rrugët e qytetit.
Pra, është përgjegjësi e Bashkisë së Tiranës, që, si masë parandaluese për përhapjen e virusit, të reduktojë, sa të mundet, qarkullimin e mjeteve të transportit publik, duke minimizuar kontaktet mes qytetarëve në ambjentet e brendshme të autobusëve.
Pikërisht, këtë përgjegjësi madhore në këto ditë të vështira për qytetarët shqiptarë, Veliaj ende nuk ka gjetur kohën që ta ushtrojë. Ai është shumë i zënë me postimet në rrjete sociale, duke anashkaluar përgjegjësitë që ka si kryetar i Bashkisë më të madhe në vend, ku qarkullojnë pjesa më e madhe e qytetarëve shqiptarë.
Duke u ndalur tek këto postimet propagandistike-Bashkia e Tiranës nuk ka publikuar asnjë vendim për dezinfektimin e autobusëve urbanë. Përtej fotove që ai ka publikuar në rrjetet sociale, nuk ka asnjë të dhënë nëse ky proces po kryhet nga Bashkia e Tiranës apo kostot i janë ngarkuar kompanive private që operojnë në linjat e kryeqytetit.
Të dhënat zyrtare në Buletinin e Prokurimit Publik, nuk kanë asnjë informacion nëse procesi i dezinfektimit është pjesë e ndonjë tenderi publik.
Në rast se dezinfektimi po kryhet nga vetë operatorët privatë, atëherë foto-propagandat e Lali Erit janë thjesht një mashtrim i radhës i tij.
