Carlos Tevez i jep titullin kampion argjentinasve të Boca Juniors, pasi mposhtën 1-0 në takimin e fundit të kampionatit Gimansia La Plata të Diego Armando Maradona. Një titull që erdhi edhe me ndihmën e Atletico Tucumana, që ndali në një barazim 1-1 River Plate.
Ricardo Zielinski mund të jetë njeriu më i urryer për tifozët e River, pasi u hoqi titullin këtë sezon, kurse 6 vite më parë kur ishte në krye të Belgranos i hodhi nga kategoria. Të mbetemi te kampionët: Boca Juniors. Carlos Tevez ishte heroi i kësaj ndeshjeje, me golin e shënuar në mesin e pjesës së dytë.
Sulmuesi, me një gjuajtje të fortë nga jashtë zone befasoi portierin e Gimnasia La Plata dhe i dha fitoren e titullin kampion skuadrës së tij. Festë e madhe, ndërkohë që ajo që tërhoqi vëmendjen ishte një veprim i Teves pa filluar ndeshja.
Ai takoi legjendën Maradona dhe e puthi në buzë. Futbollisti 36-vjeçar zbuloi më pas edhe pse e bëri diçka të tillë: “E dija se duhet ta puthja Diegon, do të isha me fat ashtu. Ndonjëherë duhet të kërkosh për fat”.
