Pak më shumë se një javë më parë, presidenti i Real Madridit, Florentino Perez mori një telefonatë të papritur.
Ndërkohë që Serie A kishte pezulluar ndeshjet për shkak të koronavirusit, Cristiano Ronaldo mendoi se ai ishte shansi më i mirë për t’u rikthyer në vendin ku kishte kaluar plot 9-të vite të karrierës së tij.
Siç raporton “Marca”, sulmuesi portugez telefonoi presidentin e Realit të Madridit për ti shprehur dëshirën e tij për të qenë i pranishëm në Santiago Bernabeu, në ndeshjen e Realit ndaj Barcelonës.
Ndërkohë që prania e Ronaldos në stadium ishte e sigurt, Real Madrid u vu menjëherë në punë për tu përgatitur për mbërritjen e yllit të tyre më të madh në histori. Gjatë telefonatës me Florentino Perez, Ronaldo ishte treguar i qartë, i cili dëshironte të vendosej në një pjesë të stadiumit sa më diskrete të ishte e mundur, duke qenë se ai akoma është një lojtar aktiv dhe luan për një skuadër tjetër.
“Los Blancos” bënë të pamundurën për të limituar vëmendjen gjatë mbërritjes së Ronaldos në stadium, por kjo nuk ishte plotësisht e mundur pasi shumë fansa e kishin nuhatur një gjë të tillë dhe ai u prit nga një numër i madh personash, fillimisht kur zbriti në Madrid por edhe duke hyrë në stadium.
Pasi ndeshja u zhvillua dhe u fitua, Ronaldo dhe Real Madrid të dy u larguan të kënaqur që rivendosën miqësitë e vjetra, sidomos pas largimit të bujshëm të sulmuesit në vitin 2018.
