Lajmin e raportuar më herët nga BoldNews.al se gjimnazi “Sami Frashëri” në kryeqytet do të shembet, e ka konfirmuar sot vetë kryebashkiaku Erion Veliaj. Ky vendim është marrë pasi kjo shkollë ka pësuar dëmtime të shumta nga tërmeti tragjik i 26 nëntorit që goditi vendin tonë.
Gjatë një aktiviteti të mbajtur sot te Liceu Artistik me rastin e 7-Marsit, Veliaj u shpreh se nuk mund të bëhet “make-up”, ndërkohë që themelet dhe kolonat nuk janë ndërruar dhe datojnë që në vitet ’60.
“Kam nostalgji për shkollën ku kam qenë unë për Sami Frashërin, por vendimi që kemi marrë, bazuar në inxhinierë, në dy palë inxhinierë është që do të bëjmë një shkollë të re. Vërtet shkolla ka pas investime, ne kemi bërë investime, kemi bërë rikonstruksione, rrjetin elektrik, sistemin e ngrohjes, por nuk kemi ndërruar kollonat dhe themelet. Kollonat dhe themelet, janë ato të viteve ’60, kështu që për sa kohë nuk mbajnë kollonat dhe themelet ne nuk mund të bëjmë makeup, duke i vënë pudër dhe buzëkuq një shkolle e cila tërmetin e radhës nuk e mban dot. Kjo është arsyeja pse kemi vendosur ta bëjmë të re nga e para, shkollën Sami Frashëri sic bëmë shkollën Kosova e shumë shkolla të tjera në Tiranë,”– u shpreh Veliaj.
Por kjo shkollë iu nënshtrua një rikonstrukturimi në vitin 2018. Veliaj nuk nguroi të filmonte veten e tij dhe t’a dërgonte kasetën e gatshme në televizione duke iu paraqitur qytetarëve si një superinvestim. Por, koha tregoi se rikonstruksioni i kryer dy vjet më parë thjesht ishte një fasadë dhe asgjë më shumë.
Por, pyetja që shtrohet sot është pse Veliaj në 2018 i bëri “make-up” kësaj shkolle, kur e dinte që themel i kishte që në vitet ’60. Sot kjo shkollë do të shembet dhe paratë publike të harxhuara në 2018 shkuan dëm. A mban përgjegjësi Veliaj për këtë gjë?
