Në laboratorin e virologjisë në Institutin e Shëndetit Publik po kryen analizat për dy raste të dyshuara me koronavirus. Lajmin e konfirmoi Silva Bino, shefe e Departamentit të Epidemiologjisë dhe Kontrollit të Sëmundjeve Infektive në Institutin e Shëndetit Publik, në një emision televiziv. Ajo shtoi se dy personat (që nuk preferoi ti quante të dyshuar, por “raste në hetim”) janë në vetë izolim.
Ajo tha se 60 përqind e rasteve të analizuara kanë qenë nga Tirana. “Por ka pasur dhe nga Durrësi, Vlora e Elbasani, janë raste që kanë pasur histori udhëtimi me Kinën fillimisht dhe Italinë, kryesisht veriun”, shtoi Bino.
Deri më tani, Shqipëria rezulton e paprekur nga koronvavirusi.
Në informacionin ditor si përfaqësuese e Task Forcës për koronavirusin, më herët gjatë ditës, Silva Bino tha se “gjatë 24 orëve të fundit janë testuar edhe 5 raste të reja në Laboratorin e Virologjisë pranë ISHP të cilat kanë rezultuar negative, pra kemi 58 raste negative”.
“Të gjitha rastet kanë rezultuar negative për COVID 19”, shtoi.
/BN/
