“Boldnews” ka mësuar një pikë kyçe të draft opinionit të Komisionit të Venecias, përsa i përket emërimeve në Gjykaten Kushtetuese, dekretit të Presidentit dhe betimit të anëtares pranë noterit.
Komisioni i Venecias, thotë se kjo është e papranueshme.
Pra, hedh poshtë ligjin e mazhorancës që kërkonte të ndryshonte ceremoninë e betimit të anëtarëve të Gjykatës Kushtetuese, për të shmangur Presidentin.
“Dispozitat e miratuara kohët e fundit, por ende jo efektive, në lidhje me një mekanizëm të paracaktuar për të marrë betimin duke i dërguar një letër me betim Presidentit në rast të refuzimit nga Presidenti për të pranuar betimin, duhet të braktiset pasi ato duket se janë jokushtetuese.”-thuhet në opinionin e Venecias.
Pikërisht ky moment, duket se ka bërë mazhorancën të tërhiqet nga shqyrtimi i dekretit të Metës, që hedh poshtë iniciativën ligjore të qeverisë. Po sot, u shpreh edhe Ambasada e SHBA që thotë se Opinioni i Venecias duhet pritur deri në fund dhe duhet respektuar. Ndërkohë, është kërkuar po ashtu të ruhet konfidencialiteti i Opinionit.
