Arrestohet në Paraguai legjenda e futbollit brazilian Ronaldinho.Ai dyshohet se ka përdorur dokumente false për të hyrë në vendin e Amerikës Jugore.
39-vjeçari u kap në kazinonë “Resort Yacht & Golf Club Paraguayo” bashkë më vëllain e tij, Roberto.
Sipas gazetës paraguaiane “La Nacion”, në hotelin ku po qëndronin ata, janë gjetur pasaporta që mbanin emrat e Ronaldinhos dhe Robertos me shtetësi paraguaiane.
Të dy vëllezërit janë duke u mbajtur në suitën e hotelit.
Ronaldinho dhe vëllai i tij ishin ftuar në Paraguai nga pronari i kazinosë, Nelson Belotti. Ronaldinhos i është mbajtur pasaporta braziliane, për shkak të një gjobe të marrë në vitin 2018.
Ish-ylli i Barcelonës dhe vëllai i tij u dënuan për ndërtim të jashtëligjshëm të një zone peshkimi në liqenin Guaiba në vitin 2015 pa licencën e duhur.
Gjykata iu caktoi atyre gjobë në vlerë 8.5 milionë dollarë në nëntor të vitit 2018 dhe pasi dështuan ta paguanin atë, Gjykata Supreme e Brazilit vendosi t’ia ndalojë Ronaldinhos largimin nga vendi.
