Ajaksi vetëm vitin e kaluar kishte krijuar një skuadër të mbushur me talente të cilët ishin të aftë të rivalizonin këdo edhe në arenën evropiane.
Gjithsesi ai grup lojtarësh dalë ngadalë po fillon të shkrihet. Në merkaton e verës u larguan dy nga futbollistët kryesorë, Mathijs De Ligt në drejtim të Juventusit dhe Frenkie De Jong në drejtim të Barcelonës. Ndërsa në merkaton e janarit, Chelsea firmosi me yllin e sulmit të Ajaksit, Hakim Ziyech, cili do të mbyllë sezonin me holandezët, ndërsa bashkimi me “Blutë” do të ndodhë në muajt e verës.
Por gjithsesi vlen të theksohet se Ajaksi ka ditur gjithmonë të rigjenerojë talentet, duke kombinuar produktin vendas me atë të jashtëm. Për të arritur këtë gjë, Ajaksi është vënë në lëvizje duke bërë një goditje të zgjuar në merkato, teksa ka rrëmbyer nga Santos talentin Giovanni Manson Ribeiro. 18-vjeçari ishte në fund të kontratës me ish-klubin e tij dhe nuk pranoi të rinovonte, duke kaluar tek Ajax.
Giovanni luan si mesfushor i avancuar dhe nga braziliani pritet shumë. Kontrata që talenti ka firmosur është 4-vjeçare.
Kështu, pas Antony që u ble nga Sao Paolo për gati 18 milionë euro (së bashku me bonuset), Ajax siguron një tjetër Brazilian.
