Kreu i Partisë Demokratike Lulzim Basha në një deklaratë për mediat nga bulevardi Dëshmorët e Kombit deklaroi se kriza politike duhet të zgjidhet një orë e më parë. Më tej, kreu demokrat deklaroi se kjo nuk është një protestë por një tubim.
“Mesazhi im është një falënderim nga zemra për gjithë qytetarët që i janë përgjigjur thirrjes për të mbrojtur Kushtetutën dhe një citim i një prej baballarëve themelues të SHBA Thomas Jefferson: e vetmja garanci për ruajtjen e lirisë është mbrojtja e Kushtetutës dhe se liria dhunohet, kur Kushtetuta shkelet.”
Duke shprehur mirënjohjen për qytetarët pjesëmarrës në manifestim, zoti Basha vuri theksin tek zgjidhja e krizës politike.
“Në Shqipëri kushtetutës i ka mbetur vetëm kapaku. Mendoj se kriza politike duhet zgjidhur një orë e më parë për Shqipërinë dhe shqiptarët dhe se e vetmja zgjidhje janë zgjedhjet e parakohshme parlamentare në një ditë me zgjedhjet legjitime vendore.”
Pyetjes përse nuk mban fjalim në protestë, zoti Basha iu përgjigj:
“Kjo nuk është një protestë, është një tubim drejtuar gjithë qytetarëve shqiptarë në mbrojtje të Kushtetutës dhe unë këtu ndodhem si qytetar, si prind, si bir nëne e babai, si bashkëshort dhe si bashkëqytetar i juaji. Unë kam dalë bashkë me miq të nderuar, me zotin Mustafaj, me zotin Bisha dhe miq të tjerë për të dhënë mesazhin e qartë se ky është tubim qytetar. Thirrja u është drejtuar qytetarëve dhe ky është një bashkim qytetar“
