Dy persona kanë humbur jetën në Durrës pasditen e sotme, si pasojë e të shtënave me armë zjarri. Njëri prej viktima është identifikuar si Anxhelo Avdia, ndërsa tjetri është Dorian Shkoza, 35 vjeç.
Të dy i përkasin komunitetit rom, janë persona me precedentë në fushën e vjedhjes dhe trafikut të drogës. Nisur nga kjo, konfliktet për drogën është një nga pistat që po hetohet nga grupi hetimor.
Ngjarja ka ndodhur në lagjen e njohur si “Nishtulla”. Dyshimet e para janë se kemi të bëjmë me një atentat të mirëfilltë. Dyshohet se nga një makainë në lëvizje është qëlluar ndaj dy personave që kanë qenë duke ecur. Plumbat u kanë marrë jetën të dyve.
“Rreth orës 18:55, në lagjen nr. 14, Nishtulla, Durrës, në rrugën afër tregut të perimeve, në rrethana akoma të paqarta kanë humbur jetën shtetasit Dorian Shkoza, 35 vjeç dhe Anxhelo Avdia, dyshohet me armë zjarri”, njoftoi policia.
Të shtënat nga një makinë në lëvizje
Paraprakisht dyshohet se është qëlluar nga një automjet në lëvizje, konfirmoi policia.
“Shërbimet e Policisë kanë mundur të identifikojnë targat dhe janë vënë në ndjekje të autorëve. Për zbardhjen e ngjarjes, në ndihmë të grupit hetimor po shkojnë specialistët e Krimeve të Rënda në Departamentin e Policisë Kriminale. Grupi hetimor, nën drejtimin e Prokurorisë, po vijon veprimet në vendngjarje, duke grumbulluar dhe fiksuar çdo provë sado të vlefshme që do t’i shërbejë zbardhjes së ngjarjes”, shtuan të njëjtat burime.
Burime pranë grupit hetimor thanë se rreth 10 persona janë shoqëruar në polici si dëshmitarë për tu marrë në pyetje.
Kontrollet në akse
“Menjëherë në vendngjarje kanë mbërritur forca të shumta policie, si dhe grupi hetimor. Janë ngritur pika kontrolli dhe është rrethuar zona në një perimetër të gjerë. Pika kontrolli janë ngritur edhe nga DVP Tiranë e Fier në aksin rrugor Durrës-Tiranë e Durrës-Lushnjë. Në mbështetje të Policisë vendore janë nisur dhe grupe të FNSH-së së Tiranës, për krehjen e zonës”, bënë me dije burime zyrtare.
Gjendet një makinë e djegur
Orët e mbrëmjes, një makinë e tipit “BENZ” është gjetur e djegur anë rrugës, pranë vendit të njohur si “Bishti i Zhigurit” në Rrogozhinë. Pas marrjes së njoftimit, policia ka shkuar në vendin ku u gjet makina. Dyshohet se mjeti është përdorur në atentat. Targa dyshohet e vjedhur.
/Boldnews.al/
