Rebani Jaupi, drejtori i Policisë së Tiranës, ka reaguar pas lajmeve se Agim Kajmaku, ish-kryebashkiaku i Vorës, i shpallur në kërkim prej muajsh, shëtit lirshëm në kryeqytet.
Siç raportohet, Jaupi i ka drejtuar mesazh shefave të komisariateve të Tiranës, duke e cilësuar të turpshme situatën, nëse vërtet Kajmaku shëtit i lirë në rrugët e kryeqytetit.
Gjithashtu, mësohet se Jaupi kërkon marrjen e masave për kapjen e Kajmakut dhe shkëmbimin e informacioneve.
“Të merren masa nga gjithë Komisariatet për kapjen e tij. Komisariati Vorë të japë lidhjet e tij në qytetin e Tiranës. Ështe person publik dhe mund të merret informacionet nga strukturat në varësi. Është e turpshme nëse vjen dhe shëtit nëTiranë dhe nuk kapet.- thuhet ndër të tjera në mesazh.
Reagimi i kryepolicit të Tiranës vjen një ditë pasi në media u publikuan imazhe të Agim Kajmakut duke shëtitur në rrugët kryesore të kryeqytetit, apo duke konsumuar kafe në bare të ndryshme.
