Tentativa për të abuzuar seksualisht me një grua 42 vjeçe, të martuar, ka çuar para drejtësisë si të pandehur një të ri, i cili akuzohet për veprën penale “Marrëdhënie seksuale me dhune me te rritura, mbetur në tentative”.
Çështja në ngarkim të tij po shqyrtohet në Gjykatën e Shkodrës, ku javën e kaluar u zhvillua seanca e fundit, që u shty për shkak të mos formimit të trupit gjykues.
Në Nëntor 2019, në seancën parapake, gjykata vendosi kalimin e çështjes në gjykim themeli. I riu, i cili po gjykohet nën masen e sigurimit personal “Arrest ne burg”, pranoi akuzat duke kërkuar gjykim të shkurtuar.
Më 2 Korrik 2019, Prokuroria Shkodër ka regjistruar procedimin penal për veprën penale “Marrëdhënia seksuale me dhunë me të rritura” mbetur ne tentative, dhe si person që dyshohej për kryerjen e kësaj vepre penale është shënuar emri i shtetasit M.B., 27 vjeç, banues në një fshat të Vaut të Dejës.
Tentativa e përdhunimit
Sipas hetimeve të akuzës: Më datë 30 Qershor 2019, rreth orës 13.30, shtetasja X.X., rreth 42 vjeçe, ka qenë e vetme në banesën e saj në Laç, duke fjetur në dhomën e gjumit. Për shkak të temperaturave të larta, kishte lënë hapur dritaret e banesës. Gjatë kësaj kohe, ka dëgjuar një zhurmë e menjëherë është ngritur nga gjumi. Ka dalë nga dhoma e gjumit e ka kontrolluar ambientet e tjera të banesës për të parë nëse në banese i kishte hyrë ndonjë person.
Pasi nuk ka vërejtur gjë, është kthyer përsëri në dhomën e gjumit. Aty, ka parë se në krevatin ku po flinte më parë, ishte ulur një mashkull i moshës rreth 26 vjeç, të cilin nuk e njihte.
Menjëherë ka bërtitur e i është drejtuar personit me fjalët: ”Kush je ti”. Ai i është përgjigjur se “jam Renato”, por që në fakt ishte i pandehuri M.B., i moshës rreth 27 vjeç.
X.X. i ka kërkuar të pandehurit të ngrihej nga krevati ku ishte ulur e të dilte jashtë nga banesa e saj, por i pandehuri, me forcë dhe kundër dëshirës së gruas, ka tentuar të abuzojë me të.
Viktima ka ulëritur e ka kërkuar ndihmë, por për shkak të pozicionit ku ndodhet banesa e saj, nuk e ka dëgjuar njeri e nuk i ka ardhur askush në ndihmë.
Pavarësisht përpjekjeve që ka bërë i pandehuri, ai nuk ka mundur dot të kryejë dot marrëdhënie seksuale me X.X. për faktin se ka ndeshur në rezistencën e gruas. Kjo gjendje ka vazhduar për rreth 2-3 minuta.
Pas shume përpjekjesh, X.X. ka arritur të çlirohet nga i pandehuri e ti ikë nga duart. Ndodhur para kësaj situate, i pandehuri ka dalë me vrap nga banesa, ka marrë një motoçikletë me ngjyre të zezë të cilin e kishte fshehur rreth 100 metër larg banesës se gruas e duke drejtuar ketë mjet është larguar në drejtim të Urës së Gjadrit.
Si u zbulua autori
Gruaja ka vënë në dijeni për ngjarjen bashkëshortin e saj, duke i shprehur atij se kishte dyshime se personi në fjalë (i pandehuri) ishte shtetasi M.B..
Gruaja së bashku me bashkëshortin e saj kanë pyetur persona dhe kanë siguruar nga rrjetet sociale fotografi të të pandehurit. X.X. pasi është njohur me imazhe të të pandehurit të nxjerra nga rrjetet sociale, ka njohur e identifikuar se personi që kishte tentuar të kryejë me dhunë me të marrëdhënie seksuale ishte shtetasi M.B.
Të nesërmen, më 1 Korrik 2019, ajo është paraqitur në Komisariatin e Policisë Vau i Dejës e ka bërë kallëzim. Në të njëjtën datë, shërbimet e policisë gjyqësore të Komisariatit të Policisë Vau i Dejës, të vënë në dijeni të fakteve të kallëzuara nga shtetasja X.X., kanë kryer veprime për të gjetur e ndaluar shtetasin M.B. dhe rreth orës 10.30 të kësaj date e kanë gjetur e ndaluar.
I pyetur nga oficerë të policisë gjyqësore, i pandehuri ka pohuar faktin se më 30 Qershor, rreth orës 13.30 minuta ka tentuar të kryej marrëdhënie seksuale me dhunë me shtetasen X.X., në banesën e kësaj të fundit.
/Boldnews.al/
