Atalanta e Berat Gjimshitit është shndërruar në një makineri të frikshme golash. Skuadra bergameske shpartalloi ditën e sotme Leçen me rezultatin 2-7 në sfidën e vlefshme për javën e 26-të të Serisë A.
Autogoli i Donatit hapi serinë e golave në minutën e 17-të, ndërkohë që Zapata dyfishoi shifrat në minutën e 22-të. Leçe reagoi menjëherë teksa barazoi rezultatin në minutat 29 dhe 40 me Saponarën dhe Donatin. Pjesa e parë u mbyll në barazim 2-2, ndërkohë që në fragmentin e dytë të lojës, zikaltërit shpërthyen duke shënuar 5 gola në portën e vendas, Iliçiç, Muriel, Malinovski dhe Zapata ishin protagonistët. Ky i fundit realizoi edhe tripletë duke u ngjitur në kuotën e 8 golave në kampionat.
Me 7 golat e shënuar sot, Atalanta bëhet skuadra me më shumë gola të shënuar në Serinë A, plot 69 në 26 javë. Për sa i përket mbrojtësit shqiptar, Berat Gjimshiti, ai nuk ishte i gatshëm në sfidën e sotme, për shkak të dëmtimit të pësuar para ndeshjes së Champions-it ndaj Valencias.
