Kjo magazinë ndodhet 40 metra nga superstrada dhe vetëm 200 metra nga hyrja e qytetit të Lezhës. Megjithëse këtu kalojnë herë pas here specialistët e mjedisit, asnjë prej tyre nuk ka folur për këtë rrezik për sa kohë pllakat e eternitit vazhdojnë të jenë mbulesa e kësaj magazine.
Eterniti ka përmbajte të lëndëve kancerogjene. Ky material në Shqipëri është një përzierje 90% me 10% e çimentos me amiantin dhe përdorej dikur për të mbuluar godinat, pasi për shkak të karakteristikave të tij eliminon zhurmën e shiut. Ekspertët thonë që rreziku është aq i lartë sa askush nuk duhet të afrohet pranë magazinës.
“Edhe ne nuk duhej të ishim afruar kaq shumë sepse përben një rrezik serioz”.
Sipas specialistit të mjedisit Gjergj Elezi qytetarët kanë informacion të kufizuar për eternitin dhe shumë nuk e njohin rrezikun.
“Qytetarët mund ta kenë përdorur edhe për mbulimin e shtëpive pa e ditur se me çfarë kanë të bëjnë”.
Largimi i materialeve të tilla është e domosdoshme, por Gjergj Elezi sqaron se ndërhyrja duhet të kryhet me mjete speciale dhe nga ekspertë.
“Duhet te sensibilizohet Bashkia, Inspektoriarti i mjedisit dhe Agjencia Kombëtare e Mjedisit që të koordinojnë veprimtarinë midis tyre, që të asgjësojnë menjëherë këto eternite. Ato duhet të asgjësohen nga profesionistë”.
Ky është vetëm një rast, por magazine të tilla të vjetra të mbuluara me eternitin kancerogjen gjenden dhe në fshatin Troshan dhe Kolosh të Lezhës./Abcnews.al
