Spektakë, gola, kartona, grindë dhe rezultat befasues. Derbi Tirana-Partizani i mbrëmjes së sotme i kishte të gjitha. Bardheblutë fituan me “manita” përballë të kuqëve duke e mbyllur në fund rezultatin 5 me 1 në favor të tyre.
Fillimisht ishin “demat e kuq” ata të cilët kaluan të parët në avantazh duke shënuar që në minutën e dytë të takimit me anë të Melo nga goditja e këndit, por festa e tyre do të zgjaste vetëm 14 minuta.
Dy penallti për bardheblutë në minutën e 16 dhe 19 do të shndërroheshin në gol nga Idriz Batha duke përmbys rezultatin. Përveç disavantazhit Partizanit do të mbetej dhe në inferioritet numerik pasi në akordimin e njëmbëdhjet metërshit të parë do të ndëshkohej me karton të kuq mbrojtësi Eno Bitri.
Goli i radhës do të vinte në fraksionin e dytë të lojës kur mbrojtësi i kuq Hektor Idrizaj do të shënonte në portë të tij në mënyrë të çuditshme. Një autogol i pabesueshëm, ku pas depërtimit të Ngo nga e djathta, mbrojtësi vlonjat e dërguar topin në trekëndëshin e portës së tij duke e çuar rezultatin në 3-1.
Por nuk do të mbyllej me kaq. Në minutën e 82 do të shënonte gol talenti bardheblu Ernest Muçi, i cili kishte vetëm 6 minuta që kishte prekur fushën e blertë. Pas tentativës së Torasës, topi u ndal fillimisht nga portieri Alban Hoxha, teksa më pas shkoi te talenti Muçi, i cili nuk fali duke e dërguar në rrjetë.
Gjithsesi kryevepra e kësaj ndeshjeje do të vinte në fund të takimit sërish nga Ernest Muçi. Në minutën e ’91, ai ekzekutoi në mënyrë perfekte një goditje dënimi duke e çuar topin në trekëndëshin e mbrojtuar nga Alban Hoxha dhe duke çuar rezultatin e përgjithshëm në 5 me 1 për të tijët.
Një rezultat që do të mbetet mend gjatë në memorien e tifozëve të Tiranës, ndërsa deri në derbin e ardshëm kryeqyteti do të dominohet sërish nga ngjyrat bardheblu.
Me këtë fitoe bardheblutë ruajnë vendin e parë në tabelin e renditjes me 47 pikë në 24 ndeshje, të cilët bënë një hap të sigurt drejt titullit kampion./ E.B./ BoldNews
