Marrëveshja sekrete me sekretarin e NATO-s/ Thaçi drejt shkarkimit nga posti i Presidentit

Sipas vlerësimit kushtetues të lëshuar nga Zyra Ligjore e Kryeministrit të Kosovës, presidenti Hashim Thaçi ka bërë shkelje të rëndë kushtetuese, dhe kjo përbën bazë për të nisur procedurat për shkarkimin e tij.

Kryeministri Kurti sot ka njoftuar kryetaren e Kuvendit, Vjosa Osmani se ka kërkuar analizën e një marrëveshjeje sekrete të 19 prillit të 2013-tës midis kryeministrit të atëhershëm të Kosovës, Hashim Thaçit dhe sekretarit të atëhershëm të NATO-s, Anders Fogh Rasmussen.

Përmes kësaj marrëveshje Thaçi, asokohe kryeministër, në emër të Kosovës, barti te KFOR-i të drejtën absolute të vetos mbi të gjitha misionet e ardhshme të FSK-së në veri të Kosovës, për një periudhë të paafatizuar.

LEXO EDHE  Koronavirusi/ Shtohen dhe 6 raste të reja të reja në Kosovë, shkon në 132 numri i të infektuarve

Kryeministri Kurti bashkë me marrëveshjen e ka publikuar opinionin e lëshuar nga Zyra ligjore e kryeministrit, përfundim i të cilit është se Thaçi ka kryer shkelje të rëndë kushtetuese.

“Duke marrë parasysh provat në dispozicion të Zyrës së Kryeministrit, si dhe dispozitat relevante të Kushtetutës së Republikës së Kosovës, ekzistojnë baza të mjaftueshme për të konstatuar ‘prima facie’ se presidenti Thaçi, gjatë kohës kur ishte kryeministër, ka kryer shkelje te rënda te Kushtetutës dhe se kryerja e këtyre shkeljeve justifikon inicimin e procedurës kushtetuese për shkarkimin e tij nga pozita e presidentit të Republikës së Kosovës”, thuhet në përfundimin e opinionit të Zyrës Ligjore të kryeministrisë të Kosovës.