Për herë të parë që nga pikasja e tij, më shumë raste të reja në një ditë për persona të infektuar me koronavirus janë diagnostikuar jashtë Kinës, sesa brenda saj. Lajmin e konfirmoi Organizata Botërore e Shëndetësisë, bazuar në raportimet e Kinës.
Shteti aziatik, vendi i shfaqjes për herë të parë të koronavirusit Covid-19, raportoi të mërkurën 412 raste të reja personazh të infektuar, ndërsa në të gjithë botën u raportuan 459. Pjesa më e madhe e rasteve brenda Kinës vijnë nga provinca Hubei, ndërsa brenda “llogarive” kineze u futën edhe 4 rastet e Hong Kongut. Ndërkohë, më shumë se gjysma e rasteve jashtë Kinës janë diagnostikuar në Korenë e Jugut, ku pati 284 raste të reja.
Numri më i madh i të infektuarve pas Koresë së Jugut është në Itali, mbi 400, ndërsa në koronavirusi është përhapur në të gjashtë kontinentet. Sekretari i Shëndetësisë, Alex Azar, tha se në Shtetet e Bashkuara të Amerikës janë në total 60 raste me persona të infektuar, 15 prej të cilëve që kanë lidhje me udhëtime apo kontakte me persona që kanë udhëtuar drejt shtetit amerikan.
Pjesa tjetër përfshin 3 shtetas amerikanë të riatdhesuar nga Wuhani, epiqendra e koronavirusit, si dhe 42 raste të personave të evakuuar nga anija turistike “Diamond Princess” në Japoni.
