Presidenti Ilir Meta, i ka shprehur mirënjohjen kompozitorit Limoz Dizdari, ish-deputet i PS-së, për solidaritetin e tij me kauzën mbarëkombëtare për mbrojtjen e Kushtetutës së Shqipërisë.
Kreu i shtetit shprehet se Dizdari është një artist i madh, dhe një prej reformatorëve të PS me kontribute historike se Kushtetuta e 1998, që Presidenti Meta e konsideron si një nga më demokratiket në Europë.
“Një mirënjohje e zjarrtë i shkon sot kompozitorit tonë të madh Limoz Dizdari, për solidaritetin e tij me kauzën mbarëkombëtare për mbrojtjen e Kushtetutës së Shqipërisë.
Aq më tepër kur vjen nga një artist i madh me kontribute të spikatura publike, dhe nga një prej reformatorëve të Partisë Socialiste me kontribute historike, që me vizionin e tyre e bënë Shqipërinë me një nga Kushtetutat më demokratike në Europë.
Ja si e bënin Kushtetutën socialistët e ndershëm e patriotë ne vitin 1998. Ndërsa sot shkelet e përdhoset me pabesi dhe poshtërsi ndaj sovranit që e votoi më 22 nëntor 1998 me Referendum.
Faleminderit Profesor Limozi!
Jam shumë herë më i bindur në drejtësinë e kauzës tonë të përbashkët!”, shkruan Meta në rrjetet sociale.
Dizdari ka qenë një ndër deputetë socialistë të pas 1997, por në kohën kur Fatos Nano nisi lëvizjen e katarsisit në PS, e cila kryesisht drejtohej kundër Ilir Metës dhe grupimit që ai drejtonte në rradhët e socialistëve, kompozitori ishte një nga mbështetësit e ish-kreut socialist.
