Kreu i partisë Konservatore dhe njëkohësisht deputeti i Parlamentit të Shqipërisë Kujtim Gjuzi së bashku me ish-trajnerin Italian të kombëtares kuqezi të futbollit Xhani De Biazi mbrëmjen e djeshme kanë qenë të ftuar në emisionin “Procesi Sportiv”.
Ndër të tjera deputeti i ka bërë disa premtime dhe një propozim italianit. Gjuzi i propozoi De Biazit që të bëhet Presidenti i Shqipërisë në Presidencën e radhës ose nëse Meta jep dorëheqjen dhe ai i premtoi se do të ketë votën e tij në Parlament. Gjithashtu Gjuzi i premtoi se me ardhjen në pushtet të konservatorëve, De Biazit do t’i dhurojë një shtëpi në Petrelë.
“Nëse konsorvatorët do të marrin qeverisjen shqiptare ju do të keni këtu shtëpinë dhe rezidencën tuaj, do t’ia dhuroj tokën në malin e Petrelës. Dhe nëse nuk doni që të jeni në nivelin e trajnerit, iu duhet patjetër të vini dhe të kandidoni për Presidencën që vjen. Presidenti i Shqipërisë, pasi unë kam deklaruar që kam hequr dorë nga posti i presidentit, të dyja të bëhet dhe president i Shqipërisë dhe president i Federatës Shqiptare të Futbollit. Ne jemi parti politike në Kuvend dhe nëse Meta jep dorëheqjen dhe kandidon De Biazi dhe nëse unë s’do ta votoja atëhere iu nuk do të kishit të drejtën të më ftoni më këtu.” – u shpreh Gjuzi.
Kujtojmë se italiani Xhani De Biazi ka dhe shtetësi shqiptare.
Për më shumë shikoni videon e mëposhtme.
