Gara për kreun e BKH-së/ Zbulohen datat e intervistave me kandidatët

Byroja e Hetimit Kombëtarë deklaroi sot se intervista me 8 kandidatë për përzgjedhjen e drejtorit te BKH-së do zhvillohet  me 26 dhe 27 shkurt.

Në një njoftim për mediet, BKH sqaron se “Komisioni i Përzgjedhjes për Drejtorin e BKH-së zhvilloi në praninë e Komisionit të Pavarur të Rishikimit (Komisionit Ndërkombëtar), mbledhjen e radhës, lidhur me procedurën e organizimit të intervistave të kandidatëve të kualifikuar deri në këtë moment për këtë pozicion.

“Në përfundim, Komisioni vendosi që intervistat do zhvillohen në datat 26 dhe 27 shkurt, 2020, në Sallën e Mbledhjeve të Prokurorisë së Posaçme kundër Korrupsionit dhe Krimit të Organizuar, e ndodhur në adresën : Rruga “Jordan Misja”, Nr.1, Tiranë. Çdo kandidat do të ketë një orë në dispozicion, për t’iu përgjigjur pyetjeve të anëtarëve të Komisionit të Përzgjedhjes”, thuhet në njoftim.

Po ashtu, BKH sqarin se: “I gjithë procesi do të monitorohet nga Komisioni i Pavaruar i Rishikimit (Komisioni Ndërkombëtar), sipas përcaktimeve të  ligjit Nr.95/2016, për Organizimin dhe Funksionimin e Institucioneve për të Luftuar Korrupsionin dhe Krimin e Organizuar”.

Gjithashtu BKH publikon dhe oraret për çdo kandidat që do t’i nënshtrohet intervistës për Drejtor të BKH-së:

Intervistat do kryhen në rendin alfabetik si më poshtë:Në datën 26.02.2020

1. Aida Veizaj, ora 10.00
2. Ardian Çipa, ora 11.00
3. Artur Beu, ora 12.00
4. Ervin Hodaj, ora 13.00

Në datën 27.02.2020

1. Gentjan Shehaj, ora 10.00
2. Lindita Nushi, ora 11.00
3. Idajet Faskaj, ora 12.00
4. Ylli Pjetërnikaj, ora 13.00

Po ashtu, Komisioni i Përzgjedhjes gjithashtu sqaron që spekullimet në media në lidhje me numrin e kandidatëve që mund të kenë ngelur në testin e poligrafit nuk janë të vërteta.

“Rezultatet e testeve të poligrafit janë konfidenciale dhe rregullat për aksesimin e një informacioni të tillë janë shumë të rrepta. Sikurse është përcaktuar në Ligjin për SPAK-un, raportet e ekzaminimeve të poligrafit ‘do të merren në konsideratë’ nga Komisioni i Përzgjedhjes për të përzgjedhur kandidatin më të mirë që do të emërohet Drejtor i BKH-së”, sqaron BHK.