Autoritetet iraniane kanë raportuar edhe për dy viktima të reja nga koronavirusi, e kjo e çon shifrën e viktimave në 8: një bilanc i tillë e bën republikën islamike vendin me numrin më të madh të vdekjeve nga Covid 19 jashtë Kinës.
Numri i të prekurve nga 28 që ishte të shtunën, ka mbërritur në 43. Epiqendra e sëmundjes në Iran ishte qyteti i Qom-it, por tani virusi është përhapur dhe në katër zona të tjera, përfshirë dhe Teheranin.
Zëdhënësi i Ministrisë së Shëndetësisë, Kianush Jahanpur, tha se 15 raste të reja me virus ishin konfirmuar gjatë ditës pa dhënë detaje të tjera për viktimat, por më herët, mediat iraniane kishin cituar drejtuesin e Universitetit Shkencor të pohonte se dhe një person që kishte udhëtuar nga Teherani në Tonekabon ka ndërruar jetë si pasojë e virusit.
Në 10 provinca janë mbyllur shkollat e vende të tjera publike. Më herët gjatë javës, Iraku, Kuvajti dhe Arabia Saudite pezulluan një numër të madh fluturimesh drejt Iranit. Në Kinë, ku është edhe epiqendra e virusit, më shumë se 2,300 persona kanë humbur jetën. Me ritme alarmuese po rritet bilanci edhe në Korenë e Jugut. Presidenti i vendit shpalli gjendjen e jashtëzakonshme të dielën pasi numri i të prekurve me virus shkoi në 556.
