Naftëtarët e Ballshit ndodhen sot në ditën e 5 të grevës së urisë, ndërsa kanë nisur tentativat e para nga ana e qeverisë për ti bërë ata që të ndryshojnë mendje.
Njëri prej grevistëve ka treguar për Fax News se ka pasur një takim me kreun e grupit parlamentar në PS Taulant Balla si dhe me zëvendësministrin e Energjitikës Ilir Bejtja.
Harizaj ka treguar se Balla dhe zv.ministri iu kanë kërkuar që të heqin dorë nga greva, me premtimin se deri të hënën do tiu hidhen 3 nga 5 rrogat e prapambetura.
Ajo që e bën dhe më të rëndë situatën, është fakti se Balla dhe zv.ministri kanë ushtruar presion në drejtim të grevistëve, në një kohë që ishin në komunikime të vazhdueshme me sms me përfaqësuesit e firmës që ka çuar drejt rrënimit Uzinën e Ballshit.
“Gjendja shëndetësore nuk është e mirë, për shkak dhe temperaturave që kanë rënë , por do të qendrojmë të fortë derisa të marrim të drejtën tonë.
Kryetari i Bashkisë na mundësoi një takim me Taulant Ballën dhe zv.ministrin Ilir Bejtja, por në takim u folën gjëra që nuk ishin fare në interesin tonë.
Na thanë që të ndërprisnim grevën, do u kalojmë një pagë për sot, të dielën mos bëni tubim, dhe të hënën do iu kalojmë dy paga të tjera thanë. Gjatë kohës që bëheshin këto biseda në tavolinë, zv.ministri iu çonte sms drejtuesve të kompanisë që janë përgjegjës për situatën tonë.
Kjo nuk mund të bëhet me komunikime në celular, njëri të jetë në Uzinë dhe tjetri të jetë në Tiranë.
Na thoshin që kompania kishte shkuar për të kërkuar para, njësoj siç bëri kryeministri pas tërmetit, që iu kërkonte ndihma të huajve.
Unë i dëgjiva se çfarë thanë ata, dhe nuk kishte asgjë konkrete, unë i thashë Ballës: ”qyteti i Ballshit po ikën në greminë, dhe ju me zotin Rama mund të ndërroni drejtimin e timonit”, dhe ai gjithmonë insistonte që ne të hiqnim dorë nga greva, dhe në fund na tha, rrini në grevë po mos dilni në media, ishin fjalë shumë provokuese ato që na thanë.
Policia na lajëmroi sot se nuk mund të dalim në tubim që të kërkojmë të drejtën tonë, pra s’kemi ne të drejtë që të kërkojmë lekët tona! Rruga jonë është të vazhdojmë grevën, do protestojmë me mjete demokratike në qytet.
Në të gjithë qytetin kemi bërë thirrje që të dalim në protestë të dielën, pasi dhe biznesi është i lidhur me uzinën, është një vend që nuk do ti dihet më pas as emri. Protesta do të zhvillohet të dielën në orën 10 e gjysmë, edhe pse nuk na jep leje policia.
Edhe ne nuk na ka marrë leje pronari, kur na ka lënë fëmijët oa Vit të Ri, nuk do tiu shtrijmë dorën atyre që të protestojmë në qytet”, u shpreh Remzi Harizaj.
Kujtojmë se prej 5 ditësh 10 punonjës së Rafinerisë së Naftës në Ballsh, janë futur në grevë urie, ku kërkojnë marrjen e 5 pagave të prapambetura, dhe nisjen e punës si normalisht në uzinë, që është burim kryesor i të ardhurave për të gjithë zonën e Ballshit.
